Narendra Modi | భారత్-అమెరికా, కెనడా సంబంధాలకు కొత్త ఊపు.. డిసెంబర్‌లో మోడీ పర్యటన?

Narendra Modi: భారత్‌ విదేశాంగ వ్యూహంలో భాగంగా ప్రధాని నరేంద్ర మోడీ ఈ ఏడాది చివర్లో అమెరికా, కెనడా పర్యటన చేపట్టే అవకాశమున్నట్లు తెలుస్తోంది. అధికారిక షెడ్యూల్ ఇంకా ప్రకటించకపోయినా, ఈ పర్యటనకు సంబంధించిన దౌత్యపరమైన ఏర్పాట్లు వేగంగా కొనసాగుతున్నట్లు సమాచారం. ప్రపంచ ఆర్థిక వ్యవస్థ, వ్యూహాత్మక భాగస్వామ్యం, వాణిజ్య సహకారం వంటి కీలక అంశాలు ఈ పర్యటనలో ప్రధాన అజెండాగా ఉండనున్నాయి.

అమెరికా పర్యటనలో భాగంగా మయామిలో జరగనున్న జీ20 దేశాధినేతల సమావేశంలో ప్రధాని మోడీ పాల్గొనే అవకాశం ఉందని దౌత్య వర్గాలు చెబుతున్నాయి. అమెరికా స్వాతంత్ర్యానికి 250 సంవత్సరాలు పూర్తవుతున్న సందర్భంగా నిర్వహించే ఈ సమావేశానికి ప్రత్యేక ప్రాధాన్యం ఏర్పడింది. ఈ సమావేశానికి హాజరు కావాలని అమెరికా ప్రభుత్వం ఇప్పటికే అధికారిక ఆహ్వానం పంపినట్లు సమాచారం.

ఇటీవల జరిగిన అంతర్జాతీయ సమావేశాల్లో ప్రధాని మోడీ, అమెరికా అధ్యక్షుడు డొనాల్డ్ ట్రంప్ మధ్య వాణిజ్యం, సాంకేతికత, భద్రత, ప్రపంచ పరిణామాలపై విస్తృతంగా చర్చలు జరిగినట్లు తెలుస్తోంది. సముద్ర భద్రత, భారతీయ నావికుల భద్రత వంటి అంశాలు కూడా చర్చల్లో ప్రస్తావనకు వచ్చినట్లు సమాచారం.

కెనడా పర్యటన కూడా భారత్‌కు కీలకంగా మారే అవకాశం ఉంది. రెండు దేశాల మధ్య సమగ్ర ఆర్థిక భాగస్వామ్య ఒప్పందం (CEPA)పై కొనసాగుతున్న చర్చలను వేగవంతం చేయడమే ప్రధాన లక్ష్యంగా భావిస్తున్నారు. ఈ ఒప్పందం ద్వారా ద్వైపాక్షిక వాణిజ్యాన్ని గణనీయంగా పెంచాలనే లక్ష్యంతో ఇరు దేశాలు ముందుకు సాగుతున్నాయి.

వాణిజ్యం, పెట్టుబడులు, కీలక ఖనిజాల సరఫరా, స్వచ్ఛ ఇంధన రంగం, విద్య, సాంకేతిక సహకారం వంటి అంశాలపై భారత్-కెనడా సంబంధాలు గత కొంతకాలంగా మరింత బలపడుతున్నాయి. ఈ నేపథ్యంలో మోడీ ప్రతిపాదిత విదేశీ పర్యటన ఇరు దేశాలతో భారత సంబంధాలకు మరింత ఊతమిచ్చే అవకాశంగా దౌత్య వర్గాలు విశ్లేషిస్తున్నాయి.