మెగాస్టార్ చిరంజీవి అభిమానానికి దేశ విదేశాల్లో ప్రత్యేక స్థానం ఉంది. లండన్లో జరిగిన ఓ కార్యక్రమంలో ఓ మహిళా అభిమాని చిరంజీవికి బుగ్గపై ముద్దుపెట్టారు. ఈ అనూహ్య ఘటనకు సంబంధించిన ఫోటో సోషల్ మీడియాలో వైరల్గా మారింది. దీనిపై ఆ మహిళా అభిమాని కుమారుడు ఎక్స్ (ట్విట్టర్) వేదికగా స్పందిస్తూ, “చిన్నప్పుడు చిరంజీవిని కలవాలనుకున్న నేనే, ఇప్పుడు మా అమ్మను ఆయన దగ్గరికి తీసుకెళ్లా” అంటూ ఆనందాన్ని పంచుకున్నారు.
ఇదిలా ఉంటే, చిరంజీవికి యూకే పార్లమెంట్లో జీవిత సాఫల్య పురస్కారం అందనుంది. నాలుగు దశాబ్దాలకు పైగా సినీ పరిశ్రమకు, ప్రజాసేవకు చేసిన కృషికి గుర్తింపుగా బ్రిటన్ అధికార లేబర్ పార్టీ ఎంపీ నవేందు మిశ్రా ఈ అవార్డును అందించనున్నారు. వివిధ దేశాల పార్లమెంట్ సభ్యుల సమక్షంలో చిరంజీవిని ఘనంగా సన్మానించనున్నారు.
ఈ కార్యక్రమానికి ఎంపీలు సోజన్ జోసెఫ్, బాబ్ బ్లాక్ మన్, ఇతర ప్రముఖులు హాజరుకానున్నారు. అదే వేదికపై బ్రిడ్జ్ ఇండియా సంస్థ మెగాస్టార్ సినీ పరిశ్రమ, ప్రజాసేవ, దాతృత్వానికి చేసిన కృషిని గుర్తించి కల్చరల్ లీడర్షిప్ ద్వారా లైఫ్టైమ్ అచీవ్మెంట్ అవార్డును ప్రదానం చేయనుంది.
ఈ గౌరవం మెగాస్టార్ చిరంజీవి ప్రపంచ వ్యాప్తంగా సొంతం చేసుకున్న ఖ్యాతికి నిదర్శనం. అభిమానుల ఆదరణ, సినీ పరిశ్రమలో ఆయన క్రియాశీలత, సామాజిక సేవా కార్యక్రమాలు చిరంజీవిని అంతర్జాతీయంగా ప్రత్యేక వ్యక్తిగా నిలిపాయి.
