Heavy Rains | కేరళలో భారీ వర్షాలు బీభత్సం.. ఐదు జిల్లాలకు రెడ్ అలర్ట్

Heavy Rains | కేరళ రాష్ట్రంలో కురుస్తున్న అతిభారీ వర్షాలు తీవ్ర నష్టాన్ని కలిగిస్తున్నాయి. నిరంతరంగా పడుతున్న వర్షాల కారణంగా పలు జిల్లాల్లో రహదారులు నీట మునిగిపోయాయి, అలాగే అనేక ఇళ్లు దెబ్బతిన్నాయి. వర్షాల ప్రభావంతో ఇప్పటివరకు ఒక వ్యక్తి ప్రాణాలు కోల్పోయిన ఘటన కూడా చోటుచేసుకుంది.

భారత వాతావరణ శాఖ (ఐఎండీ) విడుదల చేసిన హెచ్చరికల ప్రకారం కేరళలోని ఐదు జిల్లాల్లో అత్యంత భారీ వర్షాలు కురిసే అవకాశం ఉంది. మలప్పురం, కోజికోడ్, వయనాడ్, కన్నూర్, కాసర్‌గాడ్ జిల్లాలకు రెడ్ అలర్ట్ జారీ చేయగా, పతనంథిట్ట, కొట్టాయం, ఎర్నాకులం, ఇడుక్కి, త్రిశూర్, పాలక్కాడ్ జిల్లాలకు ఆరెంజ్ అలర్ట్ ప్రకటించింది. రెడ్ అలర్ట్ జోన్‌లలో వచ్చే 24 గంటల్లో 20 సెంటీమీటర్లకు పైగా వర్షపాతం నమోదయ్యే అవకాశం ఉందని అధికారులు తెలిపారు. ఆరెంజ్ అలర్ట్ ప్రాంతాల్లో 11 నుంచి 20 సెంటీమీటర్ల వరకు వర్షాలు కురిసే అవకాశం ఉంది. ఇప్పటికే పలు ప్రాంతాల్లో రోడ్లు నీట మునిగిపోవడంతో ప్రజలు ఇబ్బందులు ఎదుర్కొంటున్నారు.

త్రిశూర్ జిల్లా మనలూర్ ప్రాంతంలో ఒక తాత్కాలిక షెడ్‌పై చెట్టు కూలిపడటంతో అందులో నిద్రిస్తున్న 29 ఏళ్ల యువకుడు ప్రాణాలు కోల్పోయిన ఘటన తీవ్ర విషాదాన్ని నింపింది. అనేక చోట్ల ఆస్తి నష్టం కూడా భారీగా జరిగినట్లు సమాచారం. భారీ వర్షాల నేపథ్యంలో కేరళ ప్రభుత్వం సహాయక చర్యలను ముమ్మరం చేసింది. వర్ష ప్రభావిత ప్రాంతాల్లో రెస్క్యూ బృందాలు సహాయ కార్యక్రమాలు కొనసాగిస్తున్నాయి. పర్యాటక ప్రాంతాల్లో భద్రతా కారణాల వల్ల ఆంక్షలు విధించబడ్డాయి. కొండ ప్రాంతాల్లో ట్రెక్కింగ్ పూర్తిగా నిషేధించబడింది.

పర్యాటకులు కొండ ప్రాంతాలను వీడాలని, రాత్రి ప్రయాణాలు చేయకుండా జాగ్రత్తలు తీసుకోవాలని అధికారులు సూచించారు. వయనాడ్, కోజికోడ్, కాసర్‌గాడ్ ప్రాంతాల్లో ప్రత్యేక ఆంక్షలు అమల్లో ఉన్నాయి. దక్షిణ భారతదేశంలో నైరుతి రుతుపవనాలు ప్రవేశించడంతో కేరళతో పాటు కర్ణాటక, గోవా, మహారాష్ట్ర, ఆంధ్రప్రదేశ్, తమిళనాడులో కూడా వర్షాలు కొనసాగుతున్నాయి. ఉత్తర కేరళపై సైక్లోన్ ప్రభావం కూడా ఉండే అవకాశం ఉందని ఐఎండీ హెచ్చరించింది. ఈ నెలంతా భారీ నుంచి అతిభారీ వర్షాలు కొనసాగవచ్చని, ప్రజలు అప్రమత్తంగా ఉండాలని అధికారులు సూచిస్తున్నారు.