Deputy CM Pawan Kalyan | 2024 తీర్పే చరిత్రను మార్చింది.. పవన్ కల్యాణ్ కీలక వ్యాఖ్యలు

Deputy CM Pawan Kalyan: ఉప ముఖ్యమంత్రి, జనసేన అధ్యక్షుడు పవన్ కల్యాణ్ గ్రామాల అభివృద్ధే దేశాభివృద్ధికి పునాది అని స్పష్టం చేశారు. గ్రామస్థాయి పాలనను బలోపేతం చేయకుండా సమగ్ర అభివృద్ధి సాధ్యం కాదని ఆయన అభిప్రాయపడ్డారు. గ్రామసభలు, పంచాయతీలకు మరిన్ని అధికారాలు, బాధ్యతలు ఇవ్వాల్సిన అవసరం ఉందని ఆయన పేర్కొన్నారు. ప్రజాస్వామ్యంలో అంతిమ నిర్ణేతలు ప్రజలేనని గుర్తు చేసిన పవన్ కల్యాణ్, 2024 ఎన్నికల్లో ప్రజలు ఇచ్చిన తీర్పు రాష్ట్ర భవిష్యత్‌కు కొత్త దిశను చూపిందని అన్నారు.

కూటమి ప్రభుత్వం రెండేళ్లు పూర్తి చేసుకున్న సందర్భంగా మాట్లాడిన ఆయన, ప్రజలు కేవలం అధికారాన్ని మాత్రమే కాకుండా బాధ్యతను కూడా అప్పగించారని తెలిపారు. ఆ బాధ్యతను సమష్టిగా నెరవేర్చేందుకు ఎన్డీఏ భాగస్వామ్య పక్షాలు కలిసి పనిచేస్తున్నాయని చెప్పారు. విశాఖ ఉక్కు కర్మాగారం ప్రైవేటీకరణను అడ్డుకోవడంలో కూటమి భాగస్వామ్య పక్షాల సమన్వయం ఫలితాన్నిచ్చిందని ఆయన గుర్తు చేశారు. రాష్ట్ర ప్రయోజనాల విషయంలో కేంద్రంతో సమన్వయం చేసుకుంటూ ప్రజల ఆకాంక్షలకు అనుగుణంగా నిర్ణయాలు తీసుకుంటున్నామని వివరించారు.

ప్రజా తీర్పు ఒక తరం భవిష్యత్‌కు నమ్మకాన్ని ఇచ్చిందని, రాష్ట్ర అభివృద్ధి, యువత ఉపాధి అవకాశాల కోసం ప్రభుత్వం కట్టుబడి ఉందని అన్నారు. గ్రామ స్వరాజ్యం, స్థానిక సంస్థల బలోపేతం అంశంపై పవన్ కల్యాణ్ ప్రత్యేకంగా ప్రస్తావించారు. గ్రామాల్లో సమస్యలు స్థానికంగానే పరిష్కరించబడాలని, ప్రతి చిన్న విషయం ఎమ్మెల్యే స్థాయికి వెళ్లకూడదని చెప్పారు.

ప్రస్తుతం స్థానిక ప్రజాప్రతినిధుల అధికారాలు బలహీనపడుతున్నాయని, వ్యవస్థ మొత్తం కేంద్రీకృతమవుతుందని ఆయన ఆందోళన వ్యక్తం చేశారు. గ్రామపంచాయతీలే నిజమైన ప్రజాస్వామ్య కేంద్రాలని పేర్కొన్న పవన్ కల్యాణ్, గ్రామసభలు బలపడితేనే సర్పంచ్‌లు బలపడతారని అన్నారు. గ్రామస్థాయి నిర్ణయాలే దేశ భవిష్యత్‌ను ప్రభావితం చేస్తాయని ఆయన వ్యాఖ్యానించారు. ‘స్వర్ణ పంచాయతి’ కార్యక్రమం ద్వారా గ్రామాల ఆస్తులను నమోదు చేసి ఆదాయ వనరులు పెంచినట్లు తెలిపారు.

భారతదేశ భవిష్యత్ గ్రామసభల్లోనే నిర్ణయించబడుతుందని, ప్రతి గ్రామం బలపడితేనే రాష్ట్రం, దేశం బలపడుతుందని పవన్ కల్యాణ్ అన్నారు. వ్యక్తులపై కాకుండా వ్యవస్థలపై నమ్మకం పెట్టుకోవాలని ఆయన ప్రజలకు పిలుపునిచ్చారు.