IPL 2026: ఈ ఐపీఎల్ సీజన్లో చెన్నై సూపర్ కింగ్స్(CSK) ఆరంభం పూర్తిగా తడబడింది. తొలి మూడు మ్యాచ్ల్లోనూ పరాజయాలు ఎదుర్కొన్న సీఎస్కే ఇప్పటివరకు ఖాతా తెరవలేకపోయింది. వరుస ఓటములతో పాయింట్ల పట్టికలో వెనుకబడటమే కాకుండా, అభిమానుల్లోనూ ఆందోళన పెరిగింది.అయితే జట్టుకు ఇప్పుడు కొంత ఊరటనిచ్చే వార్త ఏమిటంటే.. డెవాల్డ్ బ్రేవిస్(csk dewald brevis return) త్వరలో మైదానంలోకి దిగే అవకాశాలు కనిపిస్తున్నాయి.
సైడ్ స్ట్రెయిన్ కారణంగా ఇప్పటివరకు ఒక్క మ్యాచ్ కూడా ఆడలేకపోయిన ఈ దక్షిణాఫ్రికా బ్యాటర్, ఏప్రిల్ 11న ఢిల్లీ క్యాపిటల్స్తో జరిగే మ్యాచ్కు అందుబాటులో ఉండొచ్చని కోచ్ స్టీఫెన్ ఫ్లెమింగ్ సంకేతాలు ఇచ్చారు.
బ్రేవిస్ లాంటి దూకుడు బ్యాటర్ లేకపోవడం సీఎస్కే మిడిల్ ఆర్డర్పై ప్రభావం చూపిందనే అభిప్రాయం బలంగా వినిపిస్తోంది. ముఖ్యంగా ఒత్తిడి పరిస్థితుల్లో వేగంగా స్కోరు పెంచే ఆటగాడు లేకపోవడంతో, జట్టు ఇన్నింగ్స్కు సరైన ఫినిషింగ్ దొరకడం లేదు.
ఇలాంటి సమయంలో బ్రేవిస్ రాక సీఎస్కే బ్యాటింగ్కు కొత్త ఊపు ఇవ్వొచ్చు. ఢిల్లీతో మ్యాచ్కు ముందు అతను పూర్తి ఫిట్నెస్ సాధిస్తే, తుది జట్టులో చోటు దక్కే అవకాశాలు బలంగా కనిపిస్తున్నాయి.
ఇక ఎంఎస్ ధోని(MS DHONI) రీ-ఎంట్రీపై మాత్రం ఇంకా స్పష్టత లేదు. తొలుత అతను ఢిల్లీ మ్యాచ్కు తిరిగి రావచ్చన్న అంచనాలు వినిపించినా, తాజా నివేదికల ప్రకారం అతని ఫిట్నెస్పై ఇంకా సందేహాలే ఎక్కువగా ఉన్నాయి.
కాఫ్ స్ట్రెయిన్ నుంచి కోలుకుంటున్న ధోని త్వరలో ఫిట్నెస్ టెస్ట్కు హాజరయ్యే అవకాశం ఉన్నప్పటికీ, ఢిల్లీ మ్యాచ్లో ఆడే అవకాశాలు అనిశ్చితంగానే ఉన్నట్లు సమాచారం.
అతను మైదానంలోకి వస్తే జట్టుకు అనుభవం, వ్యూహాత్మక మార్గదర్శకత్వం, ఒత్తిడి సమయంలో మ్యాచ్ను ముగించే నైపుణ్యం అన్నీ కలిసి పెద్ద బలం అవుతాయి. ప్రస్తుతం రుతురాజ్ గైక్వాడ్ నేతృత్వంలోని సీఎస్కేకు అదే అత్యవసరంగా కనిపిస్తోంది.
