Aqua Farmers: పశ్చిమగోదావరి జిల్లాలో ఆక్వా రైతులు తీవ్రమైన ఆర్థిక సమస్యలను ఎదుర్కొంటున్నారు. ఇప్పటికే సంక్షోభంలో ఉన్న మార్కెట్ పరిస్థితులను అమెరికా విధించిన సుంకాలు మరింత దిగజార్చాయి. మార్కెట్ పరిస్థితులు సరిగా లేక రైతులు ఇబ్బందులు పడుతుండగా, అమెరికా టారిఫ్లు సమస్యను మరింత తీవ్రమయ్యేలా చేశాయి. ఎగుమతులపై పెరిగిన భారం కారణంగా ఆక్వా రంగం కుదేలైందని రైతులు ఆవేదన వ్యక్తం చేస్తున్నారు.
ఈ సమస్యలపై పలుమార్లు ప్రభుత్వాన్ని ఆశ్రయించిన రైతులకు త్వరలోనే పరిష్కారం లభిస్తుందని ముఖ్యమంత్రి చంద్రబాబు నాయుడు హామీ ఇచ్చారు. పశ్చిమగోదావరి జిల్లా సిద్ధాంతం వేదికగా మాట్లాడిన ఆయన, ఆక్వా రంగానికి ఎదురవుతున్న సమస్యలను ప్రభుత్వం సీరియస్గా తీసుకుంటోందని తెలిపారు. ఇదే సమయంలో గత ప్రభుత్వంపై ఆయన తీవ్ర విమర్శలు చేశారు.
ప్రస్తుత ప్రభుత్వం బ్లాక్చైన్ టెక్నాలజీ ద్వారా భూ రికార్డులను భద్రపరుస్తోందని సీఎం వివరించారు. QR కోడ్తో కూడిన పాస్ పుస్తకాలను రైతులకు అందిస్తున్నామని, ఇకపై భూ రికార్డులను ఎవరూ మార్చలేరని స్పష్టం చేశారు. రీ సర్వే కార్యక్రమంలో ఈ-కేవైసీ ద్వారా రైతుల భాగస్వామ్యాన్ని పెంచామని, ఇప్పటివరకు 6,668 గ్రామాల్లో రీ సర్వే పూర్తి చేశామని తెలిపారు. సుమారు 26 లక్షల పాస్ పుస్తకాలను రైతులకు అందజేశామని పేర్కొన్నారు.
అలాగే నిషేధిత జాబితా 22ఏలో ఉన్న భూముల సమస్యలను కూడా పరిష్కరిస్తున్నామని చెప్పారు. గత ప్రభుత్వ నిర్ణయాల వల్ల ఏర్పడిన సమస్యలను సరిచేయడానికి తమకు రెండేళ్ల సమయం పట్టిందని చంద్రబాబు వ్యాఖ్యానించారు. రైతుల సంక్షేమమే ప్రభుత్వ ప్రధాన లక్ష్యమని ఆయన పునరుద్ఘాటించారు.
ALSO READ: Peddi-Box-Office | రామ్చరణ్ ‘పెద్ది’ బాక్సాఫీస్ సునామీ.. రూ. 500 కోట్ల దిశగా అడుగులు
