Rythu Bharosa: ఖరీఫ్ సీజన్ ప్రారంభం సందర్భంగా రాష్ట్ర ప్రభుత్వం అమలు చేస్తున్న రైతు భరోసా నిధుల విడుదల కార్యక్రమం వేగంగా కొనసాగుతోంది. రైతులకు అవసరమైన ఆర్థిక భరోసా అందించేందుకు ప్రభుత్వం డైరెక్ట్ బెనిఫిట్ ట్రాన్స్ఫర్ (DBT) విధానంలో నిధులను నేరుగా వారి బ్యాంకు ఖాతాల్లో జమ చేస్తోంది. తాజాగా ఈ విడతలో 7 ఎకరాల లోపు సాగు భూమి ఉన్న అర్హులైన రైతులకు సాయం విడుదల చేశారు. మొత్తం 92,729 మంది రైతుల ఖాతాల్లో రూ.354.96 కోట్లు జమ చేసినట్లు వ్యవసాయ శాఖ అధికారులు తెలిపారు.
విత్తనాలు, ఎరువుల కొనుగోళ్లు ప్రారంభమైన కీలక సమయంలో ఈ నిధులు అందడంతో రైతులు సంతృప్తి వ్యక్తం చేస్తున్నారు. ఇప్పటివరకు రాష్ట్రవ్యాప్తంగా రైతు భరోసా పథకం ద్వారా భారీ స్థాయిలో నిధుల పంపిణీ జరిగింది. అధికారిక గణాంకాల ప్రకారం 68.37 లక్షల మంది రైతుల ఖాతాల్లో మొత్తం రూ.7,490.72 కోట్లు జమ అయినట్లు అధికారులు వెల్లడించారు. వ్యవసాయ రంగాన్ని బలోపేతం చేయడం, రైతుల పెట్టుబడి భారాన్ని తగ్గించడం లక్ష్యంగా ప్రభుత్వం ఈ పథకాన్ని కొనసాగిస్తోంది. సీజన్ ప్రారంభంలోనే నిధులు విడుదల కావడంతో వ్యవసాయ పనులకు ఇది పెద్ద ఊరటగా మారింది.
