Russian Military Plane Crash: రష్యాలో ఘోర విమాన ప్రమాదం చోటుచేసుకుని 29 మంది ప్రాణాలు కోల్పోయిన విషాద ఘటన కలకలం రేపుతోంది. రష్యా సైనిక విభాగానికి చెందిన ఏఎన్-26 రవాణా విమానం క్రిమియా ప్రాంతం మీదుగా ప్రయాణిస్తుండగా అకస్మాత్తుగా రాడార్ నుంచి అదృశ్యమైంది.
అనంతరం ఆ విమానం కుప్పకూలినట్లు అధికారులు ధృవీకరించారు. ఈ ప్రమాదంలో విమానంలో ఉన్న 23 మంది ప్రయాణికులతో పాటు 6 మంది సిబ్బంది అక్కడికక్కడే మృతి చెందినట్లు రష్యా మీడియా వెల్లడించింది.
రష్యా విదేశాంగ అధికారులను ఉటంకిస్తూ స్థానిక మీడియా ఈ విషయాన్ని ప్రసారం చేసింది. ప్రమాదం జరిగిన వెంటనే సహాయక బృందాలు సంఘటనా స్థలానికి చేరుకుని శోధన చర్యలు చేపట్టాయి. అయితే ప్రమాదం తీవ్రత ఎక్కువగా ఉండటంతో ఎవరూ ప్రాణాలతో బయటపడలేదని తెలుస్తోంది.
ఈ ఘటనపై స్పందించిన రష్యా రక్షణశాఖ, విమానం కూలడానికి సాంకేతిక లోపమే ప్రధాన కారణంగా కనిపిస్తున్నట్లు తెలిపింది. విమానంపై ఎలాంటి బాహ్య దాడి జరిగిందన్న ఆధారాలు ఇప్పటివరకు లభించలేదని స్పష్టం చేసింది.
ముఖ్యంగా ఈ ఘటనలో ఉగ్రదాడి లేదా శత్రు దాడి కోణం లేదని ప్రాథమిక దర్యాప్తులో వెల్లడైనట్లు సమాచారం.
అయితే అసలు ప్రమాదానికి దారితీసిన ఖచ్చితమైన కారణాలను తెలుసుకునేందుకు రష్యా అధికారులు సమగ్ర దర్యాప్తు ప్రారంభించారు.
విమాన ప్రమాదం వెనుక సాంకేతిక వైఫల్యమా? లేక మరేదైనా లోపమా? అన్న దానిపై నిపుణుల బృందం పరిశీలన కొనసాగిస్తోంది. ఈ ప్రమాదం రష్యా సైనిక వర్గాల్లో తీవ్ర విషాదాన్ని నింపింది.
