సంధ్య థియేటర్ తొక్కిసలాట ఘటనపై సీఎం రేవంత్ రెడ్డి తీవ్ర వ్యాఖ్యలు చేశారు. ఈ ఘటనకు హీరో అల్లు అర్జున్ కారణమని ఆయన ఆరోపించారు. థియేటర్ వద్దకు నటీనటులు రావద్దని ప్రభుత్వం సూచించినప్పటికీ అల్లు అర్జున్ లెక్క చేయకుండా వచ్చారని, అదే ఈ దుర్ఘటనకు దారితీసిందని చెప్పారు. రేవతి అనే మహిళ మృతి చెందడం చాలా బాధాకరమని, ఆమె కుమారుడు ఆసుపత్రిలో చికిత్స పొందుతున్నాడని ఆవేదన వ్యక్తం చేశారు.
ఎక్స్ రోడ్ నుంచి రోడ్ షోగా కారు రూఫ్ టాప్ పై నుండి చేతులు ఊపుతూ అల్లు అర్జున్ రావడం వల్లే అభిమానులు భారీగా తరలివచ్చారని, ఆ సందర్భంలో తొక్కిసలాట జరిగిందని రేవంత్ పేర్కొన్నారు. దర్యాప్తు దశలో ఉన్న ఈ వ్యవహారంపై ఎక్కువగా మాట్లాడటం సరికాదని, కానీ బాధిత కుటుంబానికి న్యాయం జరగాలని ప్రభుత్వం ప్రకటన చేయాలని కోరారు.
సినీ ప్రముఖుల నిర్లక్ష్యాన్ని రేవంత్ కఠినంగా విమర్శించారు. 20 రోజులుగా ఆసుపత్రిలో చికిత్స పొందుతున్న చిన్నారిని పరామర్శించేందుకు ఇప్పటి వరకు ఒక్క సినీ ప్రముఖుడు కూడా ముందుకు రాలేదని దుయ్యబట్టారు. అల్లు అర్జున్ ర్యాలీ కారణంగా జరిగిన ఈ ఘోర ప్రమాదానికి పూర్తి బాధ్యత ఆయన మీదనే ఉందని చెప్పారు.
సాంఘిక బాధ్యత కలిగి ఉండాల్సిన నటులు తమ చర్యల వల్ల ప్రజలకు కలిగే ఇబ్బందులను గమనించాలని రేవంత్ సూచించారు. ఇలాంటి ఘటనలు పునరావృతం కాకుండా తగిన చర్యలు తీసుకోవాలని కోరుతూ, బాధిత కుటుంబానికి ప్రభుత్వం ఆర్థిక సాయం అందించాలని శాసనసభలో పిలుపునిచ్చారు.
