Bharat @2047: న్యూ ఢిల్లీలో ప్రధాని మోడీ నేతృత్వంలో నీతి ఆయోగ్ 11వ గవర్నింగ్ కౌన్సిల్ సమావేశం ప్రారంభం అయింది. దేశ సమగ్ర అభివృద్ధిని వేగవంతం చేసే లక్ష్యంతో నిర్వహిస్తున్న ఈ హై-లెవల్ సమావేశంలో “వికసిత్ భారత్ @2047” దిశగా కీలక వ్యూహాలపై విస్తృతంగా చర్చలు జరుగుతున్నాయి.
ఈ సందర్భంగా ప్రధాని మోడీ “టీమ్ ఇండియా” స్ఫూర్తితో కేంద్రం మరియు రాష్ట్రాలు కలిసి పనిచేయాలని పిలుపునిచ్చినట్లు సమాచారం. సహకార సమాఖ్య వ్యవస్థను మరింత బలోపేతం చేయడం ద్వారా దేశ అభివృద్ధి లక్ష్యాలను వేగంగా సాధించవచ్చని ఆయన అభిప్రాయపడ్డారు.
ఈ ఏడాది ఈ సమావేశాన్ని “వికసిత్ భారత్ @2047 దిశగా సమగ్ర మానవాభివృద్ధి” అనే ప్రధాన ఇతివృత్తంతో నిర్వహిస్తున్నారు. దేశంలోని ప్రతి పౌరుడికి సమాన అభివృద్ధి అవకాశాలు అందేలా చేయడమే లక్ష్యంగా చర్చలు కొనసాగుతున్నాయి. ఈ సమావేశానికి దేశంలోని దాదాపు అన్ని రాష్ట్రాల ముఖ్యమంత్రులు, కేంద్ర పాలిత ప్రాంతాల లెఫ్టినెంట్ గవర్నర్లు, కేంద్ర మంత్రులు మరియు నీతి ఆయోగ్ ఉన్నతాధికారులు హాజరయ్యారు. ఆరోగ్యం, పోషకాహారం, నైపుణ్యాభివృద్ధి, ఉపాధి అవకాశాలు వంటి కీలక అంశాలపై సుదీర్ఘంగా సమీక్ష జరుగుతోంది.
డిజిటల్ పబ్లిక్ ఇన్ఫ్రాస్ట్రక్చర్ (DPI)ను ఉపయోగించి సుపరిపాలనను గ్రామ స్థాయికి తీసుకెళ్లడం, ప్రభుత్వ పథకాల ఫలితాలు అర్హులైన ప్రతి వ్యక్తికి చేరేలా చేయడం వంటి అంశాలపై ప్రత్యేకంగా చర్చిస్తున్నారు. 2047 నాటికి భారతదేశాన్ని సంపూర్ణ అభివృద్ధి చెందిన దేశంగా తీర్చిదిద్దే లక్ష్యానికి అనుగుణంగా ఈ సమావేశం ఒక స్పష్టమైన రోడ్మ్యాప్ను రూపొందించనుందని అధికారులు భావిస్తున్నారు.
