పహల్గామ్ ఉగ్రదాడి అనంతరం దేశవ్యాప్తంగా నెలకొన్న ఉద్రిక్తతల ప్రభావం బాలీవుడ్ పరిశ్రమపై కూడా స్పష్టంగా కనిపిస్తోంది. మే 4, 5 తేదీలలో లండన్లో జరగాల్సిన ‘బాలీవుడ్ బిగ్ వన్’ కార్యక్రమాన్ని నిర్వాహకులు తాత్కాలికంగా వాయిదా వేయాలని నిర్ణయించారు. బాలీవుడ్ స్టార్ సల్మాన్ ఖాన్ ఈ విషయాన్ని స్వయంగా తన సోషల్ మీడియా ద్వారా వెల్లడించారు.
ఈవెంట్ వాయిదా వెనుక కారణాలను వివరించిన సల్మాన్ ఖాన్, పహల్గామ్ ఘటన వల్ల ఏర్పడిన క్లిష్ట పరిస్థితుల్లో అభిమానుల భద్రతను దృష్టిలో ఉంచుకుని ఈ నిర్ణయం తీసుకున్నామని చెప్పారు. లండన్లోని అభిమానులు ఈ ప్రదర్శన కోసం ఎంతో ఆసక్తిగా ఎదురు చూస్తున్నారని, వారి నిరాశను తాను అర్థం చేసుకుంటానని పేర్కొన్నారు. అలాగే అభిమానులకు హృదయపూర్వక క్షమాపణలు చెప్పారు.
ఈ ప్రతిష్ఠాత్మక ఈవెంట్లో సల్మాన్ ఖాన్తో పాటు మాధురీ దీక్షిత్, వరుణ్ ధావన్, టైగర్ ష్రాఫ్, కృతి సనన్ తదితర బాలీవుడ్ తారలు ప్రదర్శనలు ఇవ్వాల్సి ఉంది. అలాంటి గ్రాండ్ ఈవెంట్ను వాయిదా వేయడం నిర్వాహకులకూ కష్టం అయినప్పటికీ, భద్రతాపరమైన ఆందోళనల నేపథ్యంలో ఇది అవసరమయ్యిందని తెలిపారు.
పహల్గామ్ దాడి వల్ల భారత్-పాక్ సంబంధాలు మరింత ఉద్రిక్తతకు గురయ్యాయి. ఈ ప్రభావం లండన్ వరకూ పాకింది. అక్కడ ఇరు దేశాల మద్దతుదారుల మధ్య ఉద్రిక్తతలు తలెత్తినట్లు తెలుస్తోంది. ఈ నేపథ్యంలో బాలీవుడ్ బిగ్ వన్ వాయిదా పడటాన్ని ప్రాధాన్యమైన భద్రతా చర్యగా విశ్లేషిస్తున్నారు. కొత్త తేదీలను త్వరలో ప్రకటిస్తామని సల్మాన్ ఖాన్ హామీ ఇచ్చారు.
