అమెరికా అధ్యక్షుడు డొనాల్డ్ ట్రంప్ ట్రేడ్ వార్ ప్రభావంతో జీవితకాల గరిష్ఠానికి చేరిన బంగారం ధరలు ఇప్పుడు తగ్గుముఖం పట్టాయి. వాణిజ్య యుద్ధ భయాలు తగ్గడంతో సోమవారం పసిడి ధర కొద్దిగా తగ్గినట్లు కనిపించింది. ఇతర కరెన్సీలతో పోలిస్తే డాలర్ బలపడటం కూడా బంగారం డిమాండ్పై ప్రభావం చూపించింది.
ఎంసీఎక్స్ గోల్డ్ జూన్ 5 కాంట్రాక్ట్స్లో సోమవారం ఉదయం 9.05 గంటలకి 10 గ్రాముల బంగారం ధర 0.18 శాతం తగ్గింది. దీనితో పుత్తడి ధర రూ.94,818 వద్ద ట్రేడ్ అయింది. అంతర్జాతీయంగా కూడా బంగారం ధరలు తగ్గినట్టు నిపుణులు చెబుతున్నారు. డాలర్ ఇండెక్స్ దాదాపు 0.3 శాతం పెరగడం ఇందుకు ప్రధాన కారణంగా ఉంది.
చైనాతో వాణిజ్య ఒప్పందం సాధించేందుకు అమెరికా చర్చలు జరుపుతోందని ట్రంప్ తెలిపారు. అయితే, పెద్దగా రాయితీలు ఇవ్వకుండా చైనాపై సుంకాలు కొనసాగించే విషయంలో తాను మార్పులు చేయబోనని స్పష్టం చేశారు. ఇదే సమయంలో చైనా కొన్ని దిగుమతులపై అధిక సుంకాలను మినహాయించిందని వార్తలు చెబుతున్నాయి.
అయితే, ట్రంప్ వ్యాఖ్యలపై చైనా స్పందిస్తూ, అనుకూల వాణిజ్య ఒప్పందం గురించి మాకు ఏ సమాచారం లేదని తేల్చిచెప్పింది. ఫలితంగా అంతర్జాతీయ మార్కెట్లలో అస్పష్టత నెలకొనింది. దీని ప్రభావంతో పసిడి ధరలు ప్రస్తుతానికి తగ్గినా, భవిష్యత్తులో మళ్లీ మార్పులు సంభవించే అవకాశం ఉంది.
