George Kurien | కేంద్ర మంత్రి జార్జ్ కురియన్ రాజీనామా.. రాష్ట్రపతి ఆమోదం

George Kurien: కేంద్ర ప్రభుత్వంలో కీలక బాధ్యతలు నిర్వహించిన బీజేపీ సీనియర్ నేత, కేంద్ర మైనారిటీ వ్యవహారాలు మరియు మత్స్య శాఖ సహాయ మంత్రి జార్జ్ కురియన్ తన పదవికి రాజీనామా చేశారు. ఆయన రాజీనామాను రాష్ట్రపతి ద్రౌపది ముర్ము ఆమోదించినట్లు రాష్ట్రపతి భవన్ అధికారికంగా వెల్లడించింది.

జార్జ్ కురియన్ రాజ్యసభ సభ్యుడిగా ఆరేళ్ల పదవీకాలం పూర్తి కావడంతో పాటు, తాజాగా జరిగిన రాజకీయ పరిణామాల్లో ఆయనను మళ్లీ ఎగువ సభకు పార్టీ నామినేట్ చేయకపోవడం ఈ నిర్ణయానికి కారణమని తెలుస్తోంది. ప్రధానమంత్రి నరేంద్ర మోడీ సూచనల మేరకు ఆయన తన రాజీనామాను సమర్పించినట్లు సమాచారం.

65 ఏళ్ల జార్జ్ కురియన్ 1980ల నుంచి భారతీయ జనతా పార్టీలో కొనసాగుతూ వచ్చిన అనుభవజ్ఞులైన నాయకుల్లో ఒకరుగా గుర్తింపు పొందారు.కేరళలోని కొట్టాయం జిల్లాకు చెందిన ఆయన సుప్రీంకోర్టు న్యాయవాదిగా ప్రాక్టీస్ చేశారు. మోడీ మూడో దశ ప్రభుత్వంలో 2024 జూన్‌లో ఆయన కేంద్ర సహాయ మంత్రిగా బాధ్యతలు స్వీకరించారు.

కేంద్ర మంత్రివర్గంలో క్రైస్తవ సమాజానికి ప్రాతినిధ్యం వహించిన అరుదైన నేతగా ఆయన గుర్తింపు పొందారు. అయితే కేరళ రాజకీయ పరిస్థితుల్లో పార్టీ ఆశించిన ఫలితాలు రాకపోవడంతో ఈసారి ఆయనకు రాజ్యసభ అవకాశం దక్కలేదని రాజకీయ వర్గాల్లో చర్చ జరుగుతోంది. జార్జ్ కురియన్ రాజీనామాతో కేంద్ర మంత్రివర్గంలో ఒక కీలక మార్పు చోటు చేసుకున్నట్లైంది.