విజయనగరం జిల్లా వీ మాడుగుల మండలంలోని గిరిజన గ్రామాల ప్రజలు రోడ్ల నిర్మాణానికి డిమాండ్ చేస్తూ పెద్ద ఎత్తున ఆందోళన చేశారు. తాడివలస, గోప్పూరు, రాయిపాలెం, రాజంపేట, వెలగలపాడు, కోత్తవలస, మామిడిపాలెం గ్రామాలకు రోడ్లు, బ్రిడ్జిలు నిర్మించాలని వందలాది మంది గిరిజనులు, మహిళలు నిరసన చేపట్టారు.
ఇప్పటికే ఎన్నికల ముందు రోడ్లు, బ్రిడ్జిల నిర్మాణానికి రూ.9.30 కోట్ల నిధులు కేటాయించినట్లు చెప్పినప్పటికీ ఇప్పటివరకు పనులు ప్రారంభం కాకపోవడంపై ప్రజలు ఆగ్రహం వ్యక్తం చేశారు. వర్షాకాలంలో గర్భిణీ స్త్రీలు, బాలింతలు, వృద్ధులు తీవ్రమైన ఇబ్బందులు ఎదుర్కొంటున్నారని తెలిపారు. పిల్లలు స్కూల్‌కి వెళ్లలేక, వృద్ధులు ఆసుపత్రులకు చేరలేక తీవ్రంగా నష్టపోతున్నారని గిరిజనులు వాపోయారు.
ఈ నిరసనలో పాల్గొన్న సీపీఎం నాయకులు డి. వెంకన్న, ఇరట నరసింహమూర్తి, కె. భవాని మాట్లాడుతూ, రాష్ట్ర ప్రభుత్వం గ్రామాల అభివృద్ధిపై విస్మృతిలో పడిందని ఆరోపించారు. అధికారంలో ఉన్న ఎమ్మెల్యేలు, ఎంపీలు స్థానిక సమస్యలను పట్టించుకోవడం లేదని విమర్శించారు. ప్రభుత్వం తక్షణమే రోడ్ల నిర్మాణం చేపట్టాలని డిమాండ్ చేశారు.
ఇది కేవలం ఆరంభమని, ప్రభుత్వం పట్టించుకోకపోతే పోరాటాన్ని మరింత ఉధృతం చేస్తామని గిరిజనులు హెచ్చరించారు. ఈ నిరసనలో సోమల నరసింహారావు, జన్ని చిన్నారావు, సోలం సన్యాసమ్మ, గురువుల కృష్ణమూర్తి, సాగరి, ఈశ్వరరావు తదితరులు పాల్గొన్నారు. ప్రభుత్వానికి గిరిజనుల బాధలపై అవగాహన లేకపోవడంతో ఈ పరిస్థితి ఏర్పడిందని వారు అన్నారు.
