పశ్చిమ బెంగాల్ స్కూల్ సర్వీస్ కమిషన్ పరిధిలో జరిగిన నియామకాల్లో అవకతవకలపై సుప్రీంకోర్టు కఠిన నిర్ణయం తీసుకుంది. 25 వేల మందికి పైగా టీచర్లు, బోధనేతర సిబ్బందికి ఇచ్చిన నియామకాలను రద్దు చేస్తూ కలకత్తా హైకోర్టు ఇచ్చిన తీర్పును సమర్థించింది. నియామకాల్లో మోసం, చట్ట విరుద్ధ చర్యలు జరిగాయని ధర్మాసనం వ్యాఖ్యానించింది. ఈ తీర్పుతో మమతా బెనర్జీ ప్రభుత్వానికి ఇది తీవ్ర ఎదురుదెబ్బగా మారింది.
సుప్రీంకోర్టు ప్రధాన న్యాయమూర్తి సంజీవ్ ఖన్నా నేతృత్వంలోని ధర్మాసనం, నియామక ప్రక్రియ మొత్తం లోపభూయిష్టంగా, కళంకితంగా ఉందని స్పష్టం చేసింది. నియామకాల్లో విశ్వసనీయత ఉండకపోవడంతోనే మొత్తం ప్రక్రియను అమాన్యంగా ప్రకటించామని తెలిపింది. కాగా, కళంకిత అభ్యర్థులు తీసుకున్న వేతనాలను తిరిగి చెల్లించాల్సిన అవసరం లేదని పేర్కొనడం కొంత ఉపశమనం కలిగించింది.
ఈ కేసులో మమతా ప్రభుత్వం తరఫున న్యాయవాదులు వాదనలు వినిపించారు. నియామకాల్లో కొందరే అవకతవకలకు పాల్పడ్డారని, ఇతరులపై శిక్ష పడకూడదని అభ్యర్థించారు. కానీ ధర్మాసనం దీనిని తిరస్కరించింది. నియామక ప్రక్రియ మొత్తం మభ్యపెట్టే విధంగా జరిగిందని, ఎవరిని కళంకితంగా చూడాలి, ఎవరు శుద్ధులు అన్నది నిర్ధారించడం అసాధ్యమని వ్యాఖ్యానించింది.
2016లో జరిగిన ఈ నియామక ప్రక్రియకు 23 లక్షల మందికి పైగా అభ్యర్థులు హాజరయ్యారు. అయితే ఖాళీలకంటే ఎక్కువగా నియామక పత్రాలు జారీచేయడంపై పెద్ద ఎత్తున విమర్శలు వెల్లువెత్తాయి. అదనంగా సూపర్న్యూమరిక్ పోస్టులు సృష్టించి అక్రమ నియామకాలకే మార్గం వేసినట్టు ఆరోపణలు వచ్చాయి. ఈ తీర్పుపై మమత స్పందిస్తూ రాజకీయ ప్రతిద్వంద్వం ఉందని ఆరోపించారు.
