ప్రతిష్ఠాత్మక బోర్డర్-గవాస్కర్ ట్రోఫీలో భాగంగా పెర్త్ వేదికగా జరుగుతున్న తొలి టెస్టు మ్యాచ్ ఉత్కంఠగా మారుతోంది. తొలి ఇన్నింగ్స్లో భారత్ 150 పరుగులకు, ఆస్ట్రేలియా 104 పరుగులకు ఆలౌట్ కావడం మ్యాచ్ను మరింత రసవత్తరంగా మార్చింది. రెండవ ఇన్నింగ్స్లో ఎవరు ఆధిపత్యం సాధిస్తారో ఆసక్తిగా ఎదురు చూడాల్సి ఉంది.
భారత స్టార్ వికెట్ కీపర్ రిషబ్ పంత్ ఈ టెస్ట్లో అరుదైన ఘనత సాధించాడు. డబ్ల్యూటీసీ చరిత్రలో 2,000 పరుగుల మైలురాయిని చేరుకున్న తొలి వికెట్ కీపర్గా పంత్ రికార్డు సృష్టించాడు. ప్రస్తుతం 2,034 పరుగులతో, డబ్ల్యూటీసీలో అత్యధిక పరుగులు సాధించిన వికెట్ కీపర్గా కొనసాగుతున్నాడు. పాకిస్థాన్ కెప్టెన్ మహ్మద్ రిజ్వాన్ 1,930 పరుగులతో రెండవ స్థానంలో ఉన్నాడు.
అంతేకాదు, డబ్ల్యూటీసీలో అత్యధిక పరుగులు సాధించిన భారతీయ ఆటగాళ్లలో పంత్ మూడవ స్థానంలో నిలిచాడు. రోహిత్ శర్మ (2,685), విరాట్ కోహ్లి (2,432) తర్వాత అతని పేరు వస్తుంది. తొలి ఇన్నింగ్స్లో భారత బ్యాటింగ్ టాపార్డర్ విఫలమైనా, పంత్ 37 పరుగులు చేసి ముఖ్యమైన పాత్ర పోషించాడు.
ఇక అరంగేట్ర ఆటగాడు నితీశ్ కుమార్ రెడ్డి 41 పరుగులు చేసి ఆకట్టుకున్నాడు. భారత గౌరవప్రదమైన స్కోరును చేరుకోవడంలో అతని ఇన్నింగ్స్ కీలక పాత్ర పోషించింది. ప్రస్తుతం ఈ మ్యాచ్ ఎటువంటి మలుపు తిరుగుతుందో తెలుసుకోవడం కోసం క్రికెట్ ప్రేమికులు ఆసక్తిగా ఎదురుచూస్తున్నారు.
