WhatsApp New Head | టెక్ ప్రపంచంలో సంచలనం… వాట్సాప్‌కు కొత్త బాస్, భారతీయుడికి అవకాశం

WhatsApp New Head: భారతీయ స్టార్టప్ ఎకోసిస్టమ్‌కు మరో అరుదైన గుర్తింపు లభించింది. ఫిన్‌టెక్ రంగంలో తనదైన ముద్ర వేసిన క్రెడ్ వ్యవస్థాపకుడు కునాల్ షా, ప్రపంచంలో అత్యధికంగా వినియోగించే మెసేజింగ్ యాప్‌లలో ఒకటైన వాట్సాప్‌కు కొత్త నాయకుడిగా ఎంపికయ్యారు. ఈ మార్పుతో పాటు మెటా, క్రెడ్‌లో 900 మిలియన్ డాలర్ల పెట్టుబడి పెట్టడం టెక్ రంగంలో పెద్ద చర్చకు దారితీసింది.

దాదాపు ఏడు సంవత్సరాల పాటు వాట్సాప్‌కు నాయకత్వం వహించిన విల్ క్యాథ్‌కార్ట్ తన బాధ్యతల నుంచి తప్పుకుంటుండగా, ఆయన స్థానంలో కునాల్ షా బాధ్యతలు చేపట్టనున్నారు. అయితే క్యాథ్‌కార్ట్ పూర్తిగా సంస్థను వీడడం లేదు. మెటాలో కొత్త ఉత్పత్తుల అభివృద్ధిపై ఆయన పని చేయనున్నట్లు వెల్లడైంది. ఈ పరిణామానికి సమాంతరంగా మెటా, బెంగళూరుకు చెందిన క్రెడ్‌లో మైనారిటీ వాటాను కొనుగోలు చేస్తోంది. ఈ పెట్టుబడితో క్రెడ్ విలువ సుమారు 4.5 బిలియన్ డాలర్లకు చేరింది. భారత డిజిటల్ ఫైనాన్స్ రంగంపై మెటా పెరుగుతున్న ఆసక్తికి ఈ ఒప్పందం నిదర్శనంగా విశ్లేషకులు పేర్కొంటున్నారు.

కునాల్ షా నాయకత్వంలో వాట్సాప్ తదుపరి దశలో వ్యాపార సందేశాలు, డిజిటల్ చెల్లింపులు, ప్రకటనలు, సబ్‌స్క్రిప్షన్ సేవలు, కృత్రిమ మేధస్సు ఆధారిత ఫీచర్లపై మరింత దృష్టి పెట్టే అవకాశముందని టెక్ వర్గాలు భావిస్తున్నాయి. భారత్ వాట్సాప్‌కు అతిపెద్ద మార్కెట్ కావడం ఈ నిర్ణయానికి ప్రధాన కారణంగా చెబుతున్నారు. ఇక క్రెడ్‌లో కునాల్ షా రోజువారీ బాధ్యతల నుంచి తప్పుకోనుండగా, సంస్థ ఆర్థిక, వ్యూహాత్మక వ్యవహారాలను పర్యవేక్షిస్తున్న మిటెన్ సంపత్ తాత్కాలిక సీఈఓగా బాధ్యతలు చేపట్టారు. భవిష్యత్తులో కంపెనీ పబ్లిక్ లిస్టింగ్ దిశగా అడుగులు వేస్తున్న నేపథ్యంలో నాయకత్వ మార్పులు చోటుచేసుకున్నాయి.