చంద్రబాబు ఇంటిపై జరిగిన నిరసన ఘటన కేసులో సీఐడీ విచారణకు హాజరైన వైసీపీ నేత జోగి రమేశ్, అనంతరం మీడియాతో మాట్లాడుతూ తాను సుప్రీంకోర్టు ఆదేశాల మేరకు విచారణకు వచ్చానని తెలిపారు. ప్రజాస్వామ్యంలో నిరసనకు కూడా హక్కు లేకపోతే ఏం మిగిలిందని ప్రశ్నించారు. తామెందుకు నిరసనకు వెళ్లామో వివరించగా, చంద్రబాబు ఇంటి వద్ద శాంతియుతంగా నిరసన చేపట్టినపుడు టీడీపీ శ్రేణులే దాడి చేశాయని చెప్పారు.
తనపై అక్రమ కేసులు పెట్టి భయపెట్టాలనుకోవడం వల్ల ఎలాంటి ఫలితం ఉండదని జోగి స్పష్టం చేశారు. ప్రజాస్వామ్యంలోని హక్కుల్ని హరించడం వల్ల ప్రజల్లో ఆగ్రహమే పెరుగుతుందని హెచ్చరించారు. తనపై పెట్టిన కేసుల విషయంలో ఎంతమందిని పంపినా, ఎన్ని విచారణలు జరిపినా తాను భయపడే వ్యక్తిని కాదని ధైర్యంగా చెప్పారు. సీఐడీ ఎప్పుడైనా పిలిచినా హాజరవుతానని చెప్పారు.
జనాల్ని మభ్యపెట్టే ప్రయత్నాలు చేసేవారు ఎప్పటికీ నిలవరని అన్నారు. రెడ్ బుక్ పట్టుకుని ప్రజలను బెదిరించే రోజులు ఇక చాలన్నారు. ఏడాది తర్వాత ఈ రెడ్ బుక్‌ను ఎవరి ఇంటి అలమారలో పెడతారో అని ఎద్దేవా చేశారు. అధికారంలో ఉన్నవారికి గర్వం వద్దని, మంచి పాలన ఉంటేనే ప్రజలు గౌరవిస్తారని చెప్పారు. ప్రజలు ప్రతి నాయకుడిని పరిశీలిస్తూ ఓటు వేయాలన్నారు.
ఇటీవల వచ్చిన ఓ సర్వేలో టీడీపీ కూటమి కఠిన ఓటమిని ఎదుర్కొంటుందని వెల్లడైందని జోగి రమేశ్ పేర్కొన్నారు. ఇప్పట్లో ఎన్నికలు జరిగితే 75 మంది కూటమి అభ్యర్థులకు డిపాజిట్లు పోతాయని అన్నారు. జగనన్నను వదిలి చంద్రబాబును నమ్మిన 70 శాతం మంది ప్రజలు బాధపడుతున్నారని విమర్శించారు. సీఎం కుర్చీ కోసం నందమూరి, లోకేశ్‌ల మధ్య పోటీ నడుస్తోందని ఎద్దేవా చేశారు.
