Hyderabad Metro: ఆపదలో అండగా నిలిచిన హైదరాబాద్ మెట్రో.. మరోసారి సామాజిక బాధ్యతను నిరూపించింది. గచ్చిబౌలి నుంచి సికింద్రాబాద్ వరకు గుండె, ఊపిరితిత్తుల వంటి కీలక అవయవాలను ప్రత్యేక గ్రీన్ ఛానెల్ ద్వారా కేవలం 25 నిమిషాల్లో అత్యంత వేగంగా, సురక్షితంగా తరలించి, ప్రాణాలను కాపాడే అత్యవసర అవయవ మార్పిడి ప్రక్రియ విజయవంతం కావడంలో అధికారులు కీలక పాత్ర పోషించారు. రోడ్డు మార్గంలో ట్రాఫిక్ సమస్యలు ఉండటంతో వైద్య బృందం మెట్రో అధికారులను సంప్రదించగా, వారు వెంటనే స్పందించి ప్రత్యేక ఏర్పాట్లు చేశారు. దీంతో సుమారు 14 కిలోమీటర్ల దూరాన్ని కేవలం 25 నిమిషాల్లో పూర్తి చేసి, అవయవాలను సురక్షితంగా ఆసుపత్రికి చేర్చారు. ఈ వేగవంతమైన రవాణా వల్ల అవయవ మార్పిడి ప్రక్రియ విజయవంతంగా కొనసాగేందుకు కీలక సహకారం అందింది.
ప్రాణాపాయ పరిస్థితుల్లో అవసరమైన అన్ని విధాలా సహకారం అందించేందుకు హైదరాబాద్ మెట్రో ఎప్పుడూ సిద్ధంగా ఉంటుందని అధికారులు వెల్లడించారు. సమయస్ఫూర్తితో స్పందించి ప్రాణాలను కాపాడే ఈ చర్యపై వైద్య వర్గాలు, ప్రజలు మెట్రో అధికారులను అభినందిస్తున్నారు.
