Siddipet: సిద్దిపేటలో చిన్న వ్యాపారులను ప్రోత్సహించే దిశగా మాజీ మంత్రి, ఎమ్మెల్యే హరీశ్ రావు ముఖ్య కార్యక్రమాన్ని చేపట్టారు. ఆదివారం నియోజకవర్గంలోని వివిధ మండలాలకు చెందిన లబ్ధిదారులకు రూ.72 లక్షల విలువైన 91 టీ స్టాల్స్ను ఆయన అందజేశారు. స్వయం ఉపాధి ద్వారా కుటుంబాలు ఆర్థికంగా స్థిరపడేలా ప్రభుత్వం తరఫున సహకారం కొనసాగుతుందని ఈ సందర్భంగా ఆయన పేర్కొన్నారు.
హరీశ్ రావు మాట్లాడుతూ కష్టపడి వ్యాపారం చేసుకునే ప్రతి ఒక్కరికి తన మద్దతు ఎప్పుడూ ఉంటుందని తెలిపారు. సిద్దిపేట నియోజకవర్గంలో చిన్న హోటల్స్, టీ స్టాల్స్ నిర్వహిస్తూ జీవనోపాధి పొందుతున్న వారికి మరింత ప్రోత్సాహం ఇవ్వాలనే ఉద్దేశంతో ఈ కార్యక్రమాన్ని చేపట్టినట్లు వివరించారు. నెక్ సహకారంతో ఐదు మండలాలకు చెందిన లబ్ధిదారులకు ఈ స్టాల్స్ పంపిణీ చేసినట్లు తెలిపారు.
అదే కార్యక్రమంలో సిద్దిపేట పట్టణం 3వ వార్డు బృందావన్ కాలనీలో ఏర్పాటు చేసిన సీసీ కెమెరాలను కూడా ఆయన ప్రారంభించారు. గత పదేళ్లలో సిద్దిపేటను క్లీన్, గ్రీన్, సేఫ్ సిటీగా అభివృద్ధి చేసుకున్నామని ఆయన అన్నారు. ఈ కార్యక్రమానికి ఎర్ర యాదయ్య (మాజీ ఎంపీపీ), మారెడ్డి రవీందర్ రెడ్డి (మాజీ సుడా చైర్మన్)తో పాటు ఇతరులు హాజరయ్యారు. అలాగే సిద్దిపేట రూరల్ మండల సర్పంచుల ఫోరం నూతన కమిటీని కూడా ఈ సందర్భంగా ఎన్నుకున్నారు. అధ్యక్షుడిగా బట్టు భాస్కర్ రెడ్డి, ఉపాధ్యక్షులుగా కోడూరు మమత రాజు, పొన్నల నాగరాజ ఎన్నికయ్యారు. నూతన కమిటీకి హరీశ్ రావు అభినందనలు తెలిపారు.
