Kalvakuntla Kavitha | కవితకు ఈసీ షాక్.. ‘తెలంగాణ రక్షణ సేన’ పేరు మార్చాలని ఆదేశం

Kalvakuntla Kavitha: తెలంగాణ రాజకీయాల్లో కవిత కొత్త పార్టీ ఏర్పాటుకు సంబంధించి తాజా మలుపు చోటుచేసుకుంది. ఆమె ప్రతిపాదించిన రాజకీయ పార్టీ అంశంపై కేంద్ర ఎన్నికల సంఘం స్పందిస్తూ కీలక ఆదేశాలు జారీ చేసింది. ఆమె ప్రతిపాదించిన ‘తెలంగాణ రక్షణ సేన’ పేరును యథాతథంగా ఆమోదించలేమని స్పష్టం చేస్తూ, ప్రత్యామ్నాయ పేర్లను సమర్పించాలని ఆదేశించింది.

సమాచారం ప్రకారం, పార్టీ పేరుకు TRS అనే సంక్షిప్త రూపం ఉపయోగించడం పట్ల ఎన్నికల సంఘానికి అభ్యంతరాలు వ్యక్తమయ్యాయి. గతంలో ఇదే సంక్షిప్త నామంతో రాజకీయ కార్యకలాపాలు నిర్వహించిన పార్టీ ఉండటంతో, ఓటర్లలో గందరగోళం ఏర్పడే అవకాశం ఉందని ఈసీ అభిప్రాయపడినట్లు తెలుస్తోంది. ఈ నేపథ్యంలో ప్రస్తుతం ప్రతిపాదించిన పేరును పునఃపరిశీలించాలని సూచించింది.

కేంద్ర ఎన్నికల సంఘం పంపిన లేఖలో 15 రోజులలోపు మూడు ప్రత్యామ్నాయ పార్టీ పేర్లను ప్రతిపాదించాలని కవితను కోరింది. ఆ పేర్లలో ఒకదానిని పరిశీలించిన అనంతరం తుది నిర్ణయం తీసుకుంటామని పేర్కొంది. నిర్ణీత గడువులోగా కొత్త పేర్లు సమర్పించకపోతే పార్టీ నమోదు ప్రక్రియను నిలిపివేసే అవకాశముందని కూడా స్పష్టం చేసింది.

కొత్త రాజకీయ వేదిక ఏర్పాటు దిశగా కవిత చేస్తున్న ప్రయత్నాల నేపథ్యంలో ఎన్నికల సంఘం తీసుకున్న ఈ నిర్ణయం ప్రాధాన్యత సంతరించుకుంది. ఇప్పుడు ఆమె ఎలాంటి కొత్త పేరును ప్రతిపాదిస్తారు? ఎన్నికల సంఘం తుది నిర్ణయం ఎలా ఉంటుందనే అంశాలపై రాజకీయ వర్గాల్లో ఆసక్తికర చర్చ సాగుతోంది.