Gold and Silver Prices | బంగారం కొనాలనుకునే వారికి గుడ్ న్యూస్.. భారీగా తగ్గిన పసిడి ధరలు

Gold and Silver Prices: ఇటీవల పెరిగిన బంగారం, వెండి ధరలతో ఆందోళన చెందిన కొనుగోలుదారులకు తాజాగా ఉపశమనం కలిగింది. అమెరికా ఆర్థిక వ్యవస్థకు సంబంధించిన తాజా గణాంకాలు సానుకూలంగా వెలువడటం, అంతర్జాతీయంగా డాలర్ బలపడటం వంటి పరిణామాల నేపథ్యంలో బంగారం, వెండి ధరలు ఒత్తిడిని ఎదుర్కొంటున్నాయి. ఈ ప్రభావం దేశీయ బులియన్ మార్కెట్‌పైనా కనిపించడంతో విలువైన లోహాల ధరలు ఇటీవల స్థాయిలతో పోలిస్తే తగ్గుముఖం పట్టాయని మార్కెట్ విశ్లేషకులు పేర్కొంటున్నారు.

ఇటీవల వరుసగా పెరుగుతూ రికార్డు స్థాయిలను తాకిన బంగారం ధరలు ఇప్పుడు తగ్గుముఖం పట్టాయి. హైదరాబాద్ మార్కెట్‌లో 24 క్యారెట్ల 10 గ్రాముల బంగారం ధర సుమారు రూ.3,000 తగ్గి రూ.1,52,730కు చేరుకుంది. అలాగే 22 క్యారెట్ల 10 గ్రాముల బంగారం ధర రూ.2,750 తగ్గి రూ.1,40,000 వద్ద కొనసాగుతోంది. గ్రాము ధరల పరంగా చూస్తే, 24 క్యారెట్ల బంగారం గ్రాము రూ.15,273గా నమోదైంది. 22 క్యారెట్ల బంగారం గ్రాము రూ.14,000 కాగా, 18 క్యారెట్ల బంగారం గ్రాము ధర రూ.11,455 వద్ద ఉంది. మరోవైపు దేశ రాజధాని ఢిల్లీలో 24 క్యారెట్ల 10 గ్రాముల బంగారం ధర రూ.1,55,910గా నమోదైంది.

వెండి ధరల్లో కూడా గణనీయమైన తగ్గుదల కనిపించింది. హైదరాబాద్‌లో కిలో వెండి ధర రూ.10,000 తగ్గి రూ.2,70,000కు చేరుకోగా, ఢిల్లీలో కిలో వెండి రూ.2,65,000 వద్ద ట్రేడవుతోంది. అంతర్జాతీయ ఆర్థిక పరిణామాలు, డాలర్ బలపడటం వంటి కారణాల వల్ల సమీప కాలంలో ధరల్లో మరిన్ని మార్పులు చోటుచేసుకునే అవకాశం ఉందని మార్కెట్ వర్గాలు అంచనా వేస్తున్నాయి.