హైదరాబాద్లో జరిగిన మీడియా సమావేశంలో ఎంఐఎం చీఫ్, ఎంపీ అసదుద్దీన్ ఒవైసీ(Asaduddin Owaisi) బీఆర్ఎస్ పార్టీపై సంచలన వ్యాఖ్యలు చేశారు. బీఆర్ఎస్ను కేసీఆర్ మళ్లీ తన నియంత్రణలోకి తీసుకోవాలని ఆయన సూచించారు. ప్రస్తుతం పార్టీ తరపున మాట్లాడుతున్న కొంతమంది నేతలకు జ్ఞాపకశక్తి తక్కువగా ఉందని, అధికారంలో ఉన్నప్పుడు ఏమి చేశారు, ఇప్పుడు ఏమి మాట్లాడుతున్నారు అన్నదానిపై స్పష్టత లేదని ఆయన సెటైర్ వేశారు.
గత ప్రభుత్వ కాలంలో జరిగిన కొన్ని ఘటనలను ప్రస్తావిస్తూ, బీఆర్ఎస్ హయాంలో మైనర్ బాలికపై జరిగిన ఘటనలో ఆరోపణలు వచ్చాయని, అప్పట్లో ఎలాంటి చర్యలు తీసుకున్నారో సమాధానం చెప్పాలని ఒవైసీ ప్రశ్నించారు. పార్టీ బాధ్యతలు బదిలీ చేయాలనుకుంటున్న వారికే సరైన అవగాహన లేదని, అందుకే కేసీఆర్ స్వయంగా పార్టీని తిరిగి కంట్రోల్ చేయాలని వ్యాఖ్యానించారు. ఈ వ్యాఖ్యలు రాజకీయ వర్గాల్లో చర్చనీయాంశంగా మారాయి.
అదే సమావేశంలో నీట్-యూజీ 2026 పరీక్ష పేపర్ లీక్ ఆరోపణలపై కూడా ఆయన స్పందించారు. కఠిన చర్యలు తీసుకుంటామని, శిక్షలు విధిస్తామని చెప్పిన కేంద్ర ప్రభుత్వ హామీలకు ఏమైంది అని ప్రశ్నించారు. పేపర్ ఎలా లీక్ అయిందో వివరణ ఇవ్వాలని డిమాండ్ చేశారు.
సంవత్సరాలుగా కష్టపడుతున్న విద్యార్థుల భవిష్యత్తు, కోచింగ్ కోసం భారీగా ఖర్చు చేస్తున్న తల్లిదండ్రుల పరిస్థితి, పేద విద్యార్థుల ఆశలు అన్నింటిని ప్రభుత్వం గమనించాలని ఆయన అన్నారు. ఈ ఘటనపై ప్రధాని నరేంద్ర మోడీ సమాధానం చెప్పాలని ఒవైసీ డిమాండ్ చేశారు.
