Telangana Heatwave: తెలంగాణ ప్రజలకు వాతావరణ శాఖ హెచ్చరించింది. ఏప్రిల్ 12 నుంచి 22 వరకు రాష్ట్రవ్యాప్తంగా హీట్వేవ్ ప్రభావం తీవ్రంగా ఉండే అవకాశం ఉందని అంచనా వేస్తున్నారు. ఈ కాలంలో తెలంగాణలోని చాలా ప్రాంతాల్లో ఉష్ణోగ్రతలు 40 డిగ్రీల సెల్సియస్కు పైగా నమోదయ్యే అవకాశముంది.
ప్రత్యేకంగా ఉత్తర తెలంగాణ, తూర్పు తెలంగాణ జిల్లాల్లో ఎండల తీవ్రత మరింత అధికంగా ఉండే అవకాశం ఉందని వాతావరణ విశ్లేషకులు చెబుతున్నారు. కొన్ని ప్రాంతాల్లో ఉష్ణోగ్రతలు 44 డిగ్రీల సెల్సియస్ దాటే అవకాశముందని హెచ్చరిస్తున్నారు. దీంతో ప్రజలు అప్రమత్తంగా ఉండాలని సూచిస్తున్నారు.
ఇక హైదరాబాద్ నగరంలో కూడా పరిస్థితి ఆందోళనకరంగా ఉండనుంది. ఏప్రిల్ 12 నుంచి 22 వరకు దాదాపు 10 రోజుల పాటు వరుసగా 40 నుంచి 41 డిగ్రీల మధ్య ఉష్ణోగ్రతలు నమోదయ్యే అవకాశముందని అంచనా. దీంతో నగర ప్రజలు, ఉద్యోగులు, విద్యార్థులు, చిన్నారులు, వృద్ధులు ప్రత్యేక జాగ్రత్తలు తీసుకోవాల్సిన అవసరం ఉందని నిపుణులు సూచిస్తున్నారు.
ఈ దగ్గరలో రాష్ట్రంలో పెద్దగా వర్షాలు కురిసే సూచనలు కనిపించడం లేదని, అక్కడక్కడా మాత్రమే స్వల్ప జల్లులు పడే అవకాశం ఉందని చెబుతున్నారు. అయితే ఇవి ఎండల తీవ్రతను తగ్గించే స్థాయిలో ఉండకపోవచ్చని అంచనా వేస్తున్నారు.
వైద్య నిపుణులు ప్రజలకు పలు సూచనలు చేస్తున్నారు. ఎక్కువగా నీరు, మజ్జిగ, కొబ్బరినీరు వంటి ద్రవపదార్థాలు తీసుకోవాలని, మధ్యాహ్నం 12 గంటల నుంచి 4 గంటల మధ్య అనవసరంగా బయటకు వెళ్లకుండా ఉండాలని సూచిస్తున్నారు.
బయటకు వెళ్లాల్సి వస్తే తల కప్పుకోవడం, తేలికపాటి దుస్తులు ధరించడం, పిల్లలు మరియు వృద్ధులను ఎండలోకి వెళ్లనివ్వకుండా జాగ్రత్తలు తీసుకోవాలని హెచ్చరిస్తున్నారు.
రాబోయే రోజుల్లో తెలంగాణలో ఎండల ప్రభావం మరింత పెరిగే అవకాశమున్నందున ప్రజలు ముందస్తు జాగ్రత్తలు తీసుకోవడం అత్యంత అవసరమని నిపుణులు చెబుతున్నారు.
