హరియాణాలోని ఫరీదాబాద్ జిల్లాలో 37 ఏళ్ల దివ్యాంగురాలు సోనియా తన జీవిత పోరాటంతో అందరికీ ఆదర్శంగా నిలుస్తున్నారు. చిన్నప్పటి నుంచే కాలు సరిగా పనిచేయని ఆమె నిలబడటానికి కూడా ఇబ్బందిపడుతుంటారు. అయినప్పటికీ, తన కుటుంబాన్ని కాపాడుకోవడం కోసం ఎలక్ట్రిక్ ఆటో రిక్షా నడుపుతూ జీవనం సాగిస్తున్నారు.
సోనియాకు భర్త అనిల్ మాదకద్రవ్యాలకు బానిస కావడంతో కుటుంబం కష్టాల్లో పడింది. ఇల్లు పోషించడమే కాకుండా, 13 ఏళ్ల కుమార్తె చదువు ఖర్చులు కూడా చూసుకోవాల్సి రావడంతో ఆమెకు ఆర్థిక భారాలు మోస్తరంగా మారాయి. భర్త సంపాదనపై ఆధారపడలేకపోవడంతో తనే పని చేయాలనే ధైర్య నిర్ణయం తీసుకున్నారు.
తన తండ్రి చిన్నతనంలోనే చనిపోవడంతో తల్లి, తాను కలిసి దిల్లీ నుంచి ఫరీదాబాద్ వచ్చారని సోనియా చెబుతున్నారు. పెళ్లి తర్వాత కొన్నేళ్లలోనే భర్తపై నిరాశకు గురయ్యారని, అతని సంపాదనతో కుటుంబాన్ని నడపడం అసాధ్యమైందని గుర్తు చేసుకున్నారు. చివరికి తనే ముందుకొచ్చి ఎలక్ట్రిక్ రిక్షా నడిపి జీవనోపాధి కొనసాగిస్తున్నారు.
“నేను దివ్యాంగురాలిని అయినప్పటికీ, నా బిడ్డ చదువు ఆగిపోకూడదని రిక్షా నడపాలని నిర్ణయించుకున్నాను. భర్త డ్రగ్స్కు బానిస కావడంతో ఇంట్లో శాంతి లేకుండా పోయింది. అయినా నా కుమార్తె భవిష్యత్తు కోసం తపనపడుతున్నాను,” అని సోనియా కన్నీటి గాధ చెబుతున్నారు.
రిక్షా నడుపుతూ సమాజంలో చాలా మంది నుంచి తనకు మద్దతు లభించిందని ఆమె పేర్కొన్నారు. ట్రాఫిక్ పోలీసులు కూడా తన కృషిని ప్రశంసించారని చెప్పారు. అయితే ప్రభుత్వం నుంచి ఇప్పటివరకు ఎటువంటి సహాయం లేదా పింఛన్ అందలేదని వాపోయారు. “నాకు దివ్యాంగ సర్టిఫికేట్ ఉన్నా, ఎలాంటి ఆర్థిక సహాయం ఇవ్వలేదు. ప్రభుత్వం కనీసం పింఛన్ మంజూరు చేస్తే నా కుటుంబానికి ఉపశమనం లభిస్తుంది,” అని ఆమె విజ్ఞప్తి చేశారు.
ప్రయాణికులు కూడా సోనియా పట్టుదలను చూసి ఆశ్చర్యపోతున్నారు. “ఒక మహిళా, అది కూడా దివ్యాంగురాలు ఇలా కష్టపడి రిక్షా నడిపి కుటుంబాన్ని పోషించడం గొప్ప విషయం. ప్రభుత్వం ఆమెకు సహాయం అందించాలి” అని పలువురు కోరుతున్నారు.
సోనియా గాధ ఇప్పుడు సోషల్ మీడియాలో విస్తృత చర్చకు దారితీస్తోంది. ఒక మహిళ తన భుజాలపై మొత్తం కుటుంబాన్ని మోస్తూ ధైర్యంగా జీవించడం అనేక మందికి ప్రేరణగా నిలుస్తోంది.
