గన్నవరం మాజీ ఎమ్మెల్యే వల్లభనేని వంశీ అరెస్టుపై హోం మంత్రి అనిత కీలక వ్యాఖ్యలు చేశారు. వంశీ అరెస్ట్ అనేది అక్రమమేమీ కాదని, సక్రమమైనదేనని ఆమె స్పష్టం చేశారు. న్యాయపరంగా జరిగిన అరెస్టును తప్పుడు ప్రచారం చేయడం కరెక్ట్ కాదని అనిత తెలిపారు.
వంశీ అరెస్టును కర్మ సిద్ధాంతంగా అభివర్ణించిన హోం మంత్రి, గతంలో చేసిన తప్పులు ఇప్పుడు ప్రభావం చూపించాయని వ్యాఖ్యానించారు. ప్రభుత్వ పరంగా చట్టబద్ధమైన ప్రక్రియల ద్వారా అరెస్ట్ జరిగిందని, ఎవరూ తప్పుగా ప్రచారం చేయొద్దని హోం మంత్రి స్పష్టం చేశారు.
డీజీపీకి ఫిర్యాదు చేసేందుకు వెళ్తే ఆయన అందుబాటులో లేరన్న వంశీ అనుచరుల వ్యాఖ్యలను అనిత ఖండించారు. డీజీపీ పనుల్లో బిజీగా ఉండటం సహజమని, అవసరమైతే మరుసటి రోజు వచ్చి ఫిర్యాదు చేయాలని సూచించారు. దాన్ని వివాదంగా మార్చడం సరైన పద్ధతి కాదని ఆమె అన్నారు.
ప్రభుత్వం అన్ని చట్టాలను పాటిస్తూ ముందుకు వెళ్తుందని హోం మంత్రి అనిత తెలిపారు. వంశీ అరెస్టుకు సంబంధించి ఎలాంటి రాజకీయ మతలబులు లేవని స్పష్టం చేశారు. నిర్దోషులెవరైనా చట్టపరంగా తమ నిర్ధారణ చేసుకోవచ్చని, కానీ ప్రభుత్వం విధానాలను తప్పుబట్టడం తగదని సూచించారు.
