హనుమకొండ జిల్లా కలెక్టర్ పి. ప్రావిణ్య మాట్లాడుతూ అర్హులందరికీ ప్రభుత్వ పథకాలు అందుతాయని తెలిపారు. హసన్పర్తి మండలం నాగారం గ్రామ పంచాయతీ కార్యాలయం వద్ద నిర్వహించిన ప్రజా పాలన గ్రామ సభలో ఆమె పాల్గొన్నారు. ప్రభుత్వ పథకాలు సద్వినియోగం చేసుకోవాలని ప్రజలకు సూచించారు.
ఈ కార్యక్రమంలో రాష్ట్ర ప్రభుత్వం అమలు చేయనున్న రైతు భరోసా, ఇందిరమ్మ ఆత్మీయ భరోసా, కొత్త రేషన్ కార్డులు, ఇందిరమ్మ ఇండ్లు పథకాలకు లబ్ధిదారుల ఎంపికపై చర్చ జరిగింది. హెల్ప్ డెస్క్లను కలెక్టర్ పరిశీలించి, దరఖాస్తు ప్రక్రియను సమీక్షించారు. ప్రజలకు వీటిపై అవగాహన కల్పించాల్సిన అవసరాన్ని ఆమె ప్రస్తావించారు.
కలెక్టర్ మాట్లాడుతూ ప్రభుత్వం చేపడుతున్న సంక్షేమ కార్యక్రమాలు గ్రామీణ అభివృద్ధికి దోహదపడతాయని అన్నారు. ప్రజల సమస్యలను ప్రత్యక్షంగా తెలుసుకునేందుకు ఈ గ్రామ సభలు ఉపయుక్తంగా ఉంటాయని తెలిపారు. అర్హులైన ప్రతి ఒక్కరికీ లబ్ధి చేకూరేలా అధికారులు కృషి చేయాలని ఆదేశించారు.
ఈ కార్యక్రమంలో మండల ప్రత్యేక అధికారి, జిల్లా హార్టికల్చర్ అధికారి వెంకటేశ్వర్లు, డీఎల్పీవో గంగ భవాని, ఇంచార్జ్ ఎంపిడీవో కరుణాకర్ రెడ్డి, నాయబ్ తహసీల్దార్ రహీం పాషా, ఏపీవో విజయలక్ష్మి తదితరులు పాల్గొన్నారు. గ్రామస్థులు కలెక్టరుతో సమస్యలు పంచుకుని, తమ అభ్యర్థనలు వినిపించారు.
