తెలంగాణ ప్రభుత్వం రిజిస్ట్రేషన్ ప్రక్రియను మరింత వేగవంతం చేసేందుకు నూతనమైన విధానానికి శ్రీకారం చుట్టింది. ఇకపై రిజిస్ట్రేషన్ల కోసం ప్రజలు తగిన స్లాట్ను ముందుగా బుక్ చేసుకుని, ఇచ్చిన సమయానికి రిజిస్ట్రేషన్ను పూర్తిచేసుకోవచ్చు. ఈ మేరకు రాష్ట్ర రేవెన్యూ, హౌసింగ్ మరియు సమాచార పౌర సంబంధాల శాఖ మంత్రి పొంగులేటి శ్రీనివాస్ రెడ్డి అధికారికంగా ప్రకటన చేశారు.
ఈ నెల 10వ తేదీ నుంచి ఈ స్లాట్ బుకింగ్ విధానం అమలులోకి రానుందని మంత్రి తెలిపారు. ప్రారంభ దశలో 22 సబ్ రిజిస్ట్రార్ కార్యాలయాల్లో ఈ విధానాన్ని ప్రయోగాత్మకంగా అమలు చేయనున్నారు. ప్రస్తుతం ఒక రిజిస్ట్రేషన్కు సగటున 45 నిమిషాలు పడుతుండగా, కొత్త విధానంతో కేవలం 10-15 నిమిషాల్లోనే ప్రక్రియ పూర్తవుతుందని తెలిపారు. దీని వల్ల ప్రజలు సమయాన్ని ఆదా చేసుకోవచ్చు.
చట్టసవరణలతో డబుల్ రిజిస్ట్రేషన్లకు చెక్ పెట్టే దిశగా చర్యలు చేపట్టామని మంత్రి పేర్కొన్నారు. పారదర్శకత కోసం ఈ స్లాట్ బుకింగ్ విధానాన్ని తీసుకువచ్చామని వెల్లడించారు. ప్రజలకు అవినీతి లేకుండా, సమర్థవంతంగా సేవలు అందించేందుకు ఇది కీలకమని వివరించారు. ప్రభుత్వం ఐటీ పరిజ్ఞానాన్ని ఉపయోగించి కార్యాలయాల ఆధునీకరణపై దృష్టి పెట్టిందని చెప్పారు.
సబ్ రిజిస్ట్రార్ కార్యాలయాల్లో ఆర్టిఫీషియల్ ఇంటెలిజెన్స్, చాట్బోట్లు వంటి టెక్నాలజీలను వినియోగించాలన్నది మంత్రి సూచన. స్లాట్ బుకింగ్ విధానంతో మానవశక్తిపై ఆధారపడకుండా సేవలు త్వరగా పూర్తవుతాయని తెలిపారు. అధికారులకు పునర్వ్యవస్థీకరణ చర్యలు చేపట్టాలని సమీక్షలో మంత్రి సూచించారు. ఇది రిజిస్ట్రేషన్ల రంగంలో సాంకేతిక విప్లవానికి నాంది కానుంది.
