Harish Rao | ప్రాజెక్టు కోసం పాదయాత్ర చేస్తా: హరీష్ రావు కీలక ప్రకటన

సంగారెడ్డి జిల్లాలో నీటి సమస్యలు, రైతుల ఇబ్బందులను ప్రధాన అంశాలుగా తీసుకుని మాజీ మంత్రి హరీష్ రావు(Harish Rao) రాష్ట్ర ప్రభుత్వంపై తీవ్ర విమర్శలు చేశారు. సంగమేశ్వర–బసవేశ్వర(Sangameshwara-Basaveshwara) ఎత్తిపోతల పథకాన్ని వెంటనే పూర్తి చేయాలని డిమాండ్ చేస్తూ త్వరలో భారీ పాదయాత్ర చేపట్టనున్నట్లు ప్రకటించారు.

ఈ ప్రాజెక్టు పూర్తయితే జిల్లాలోని సాగునీటి సమస్యలకు శాశ్వత పరిష్కారం లభిస్తుందని ఆయన అభిప్రాయపడ్డారు. సింగూరు ప్రాజెక్టులో ఉన్న నీటిని పూర్తిగా వినియోగించడంతో రైతులు ఇబ్బందులు ఎదుర్కొంటున్నారని హరీష్ రావు ఆరోపించారు. పంటలు వేయొద్దని సూచించినప్పటికీ, రైతులకు ఇవ్వాల్సిన పరిహారం ఇప్పటికీ అందలేదని అన్నారు.

వ్యవసాయ రంగానికి భరోసాగా ఉంటుందని ప్రచారం చేసిన పంటల బీమా పథకం కూడా ఆశించిన ఫలితాలు ఇవ్వలేదని విమర్శించారు. అలాగే, ఇందిరమ్మ ఆత్మీయ భరోసా వంటి సంక్షేమ కార్యక్రమాల అమలులోనూ ప్రభుత్వం విఫలమైందని పేర్కొన్నారు. ముఖ్యమంత్రి రేవంత్ రెడ్డి ఎన్నికల సమయంలో ఇచ్చిన హామీలను నిలబెట్టుకోలేకపోయారని, వివిధ వర్గాల ప్రజలు నిరాశ చెందుతున్నారని హరీష్ రావు అన్నారు.

రాష్ట్రంలో అభివృద్ధి కంటే అవినీతి ఆరోపణలే ఎక్కువగా వినిపిస్తున్నాయని, ప్రభుత్వ శాఖల్లో పారదర్శకత లేకుండా వ్యవహరిస్తున్నారని విమర్శించారు. గురుకుల పాఠశాలల టెండర్ల వ్యవహారంలో అక్రమాలు జరిగాయని ఆరోపిస్తూ, వాటిపై సమాధానం చెప్పాల్సిన బాధ్యత ప్రభుత్వానిదేనన్నారు. తమ పార్టీ నేతలు సంబంధిత అధికారులను కలిసి వివరణ కోరేందుకు ప్రయత్నించినప్పుడు కూడా పోలీసుల ద్వారా అడ్డంకులు సృష్టించారని హరీష్ రావు ఆరోపించారు.

ముఖ్యమంత్రి తనపై వ్యక్తిగత వ్యాఖ్యలు చేయడం సరికాదని, ప్రజా సమస్యలపై దృష్టి పెట్టాలని సూచించారు. రాష్ట్రంలో గత బీఆర్ఎస్ ప్రభుత్వం చేపట్టిన అభివృద్ధి పనులు ఇప్పటికీ ప్రతి గ్రామంలో కనిపిస్తాయని ఆయన పేర్కొన్నారు. ప్రజల విశ్వాసం మళ్లీ బీఆర్ఎస్ వైపే ఉందని, భవిష్యత్తులో పార్టీ తిరిగి అధికారంలోకి వస్తుందనే నమ్మకం వ్యక్తం చేశారు.