Bangkok | థాయ్‌లాండ్‌లో భారీ విషాదం.. పబ్‌లో మంటలు చెలరేగి 27 మంది దుర్మరణం

Bangkok: థాయ్‌లాండ్ రాజధాని బ్యాంకాక్‌లోని ఓ పబ్‌లో జరిగిన భారీ అగ్నిప్రమాదం ఆ దేశాన్ని విషాదంలో ముంచెత్తింది. అర్ధరాత్రి తర్వాత ఒక్కసారిగా మంటలు చెలరేగడంతో పబ్‌లో ఉన్నవారిలో తీవ్ర భయాందోళన నెలకొంది. ఈ ఘటనలో 27 మంది ప్రాణాలు కోల్పోగా, మరో 63 మంది గాయాలతో ఆసుపత్రుల్లో చికిత్స పొందుతున్నారు. వారిలో పలువురి పరిస్థితి ఆందోళనకరంగా ఉన్నట్లు అధికారులు వెల్లడించారు.

వారాంతం కావడంతో పబ్‌లో సందర్శకుల రద్దీ ఎక్కువగా ఉన్నట్లు తెలుస్తోంది. సంగీత కార్యక్రమం కొనసాగుతున్న సమయంలో విద్యుత్ వ్యవస్థ వద్ద నుంచి పొగ రావడాన్ని కొందరు గుర్తించారు. కొద్ది క్షణాల్లోనే భారీ శబ్దంతో పేలుడు సంభవించడంతో విద్యుత్ సరఫరా నిలిచిపోయింది. అనంతరం మంటలు వేగంగా భవనం అంతటా వ్యాపించాయి. హఠాత్తుగా చీకట్లు అలుముకోవడం, దట్టమైన పొగ వ్యాపించడం వల్ల బయటకు వెళ్లే మార్గాలు గుర్తించలేక చాలామంది లోపలే చిక్కుకుపోయారు. ప్రాణాలను కాపాడుకునేందుకు పరుగులు తీసినప్పటికీ, విషపూరిత పొగ కారణంగా చాలామంది అపస్మారక స్థితికి చేరుకున్నట్లు అధికారులు భావిస్తున్నారు.

సమాచారం అందుకున్న అగ్నిమాపక సిబ్బంది తక్షణమే సంఘటన స్థలానికి చేరుకుని మంటలను అదుపులోకి తీసుకొచ్చారు. సహాయక చర్యల అనంతరం భవనం లోపల పలువురి మృతదేహాలను వెలికితీశారు. ముఖ్యంగా టాయిలెట్ ప్రాంతం వద్ద ఎక్కువ మంది మృతులు కనిపించడంతో, అక్కడ ఆశ్రయం పొందేందుకు ప్రయత్నించి ఉండవచ్చని అధికారులు అనుమానిస్తున్నారు.

ప్రాథమిక విచారణలో, మంటల కంటే విషపూరిత పొగను అధికంగా పీల్చడమే ఎక్కువ మంది మృతికి కారణమైనట్లు తేలింది. పబ్‌లో ఉపయోగించిన అలంకరణ సామగ్రి దగ్ధమవడంతో భారీగా విషవాయువులు విడుదలయ్యాయని అధికారులు తెలిపారు. ప్రమాదానికి గల ఖచ్చితమైన కారణాలను తెలుసుకునేందుకు దర్యాప్తు కొనసాగుతోంది.