ఆంధ్రప్రదేశ్ పర్యాటక శాఖకు చెందిన బస్సులో మైనర్ బాలిక లైంగిక వేధింపులకు గురైన ఘటన ఆలస్యంగా వెలుగులోకి వచ్చి కలకలం రేపుతోంది. ఈ నెల 14న తిరుపతి నుంచి కోయంబత్తూర్ వెళ్లేందుకు బయలుదేరిన ఏపీ టూరిజం బస్సులో ఈ అమానుష ఘటన జరిగినట్లు బాధితురాలి తండ్రి ఫిర్యాదు చేశారు. ఆ బస్సులో ప్రయాణిస్తున్న సమయంలో తన కుమార్తెను ఓ అనధికారిక ప్రయాణికుడు వేధించాడని ఆయన పేర్కొన్నారు.
బస్సు సిబ్బంది అనధికారికంగా ప్రయాణికులను ఎక్కించారని, బస్సులోని సీసీ కెమెరాలు పనిచేయకపోవడమే కాకుండా, డ్రైవర్ సహా సిబ్బంది బాధ్యతారాహిత్యంగా వ్యవహరించారని బాధిత బాలిక తండ్రి ఆవేదన వ్యక్తం చేశారు. ఈ నేపథ్యంలో ఆయన తమిళనాడు ముఖ్యమంత్రి ఎం.కె. స్టాలిన్, ఏపీ ముఖ్యమంత్రి చంద్రబాబునాయుడికి ఫిర్యాదు పంపారు. అంతేగాక, టూరిజం శాఖ ఉన్నతాధికారులకూ ఈ మేరకు ఈ-మెయిల్ ద్వారా వివరాలను తెలిపారు.
ఈ ఫిర్యాదు ఆధారంగా ఏపీ టూరిజం శాఖ అధికారులు స్పందించారు. వెంటనే చర్యలు చేపట్టాలని నిర్ణయించారు. ప్రాథమికంగా విచారణ ప్రారంభించి, బస్సు సిబ్బందిపై క్రమశిక్షణ చర్యలు తీసుకునే దిశగా చర్యలు మొదలయ్యాయి. డ్రైవర్పై ఆదేశాల లంఘన, సురక్షిత ప్రయాణానికి విఘాతం కలిగిన కారణంగా ప్రాథమికంగా నివేదిక సిద్ధమైంది.
ఈ ఘటనతో పర్యాటక శాఖపై ప్రజల్లో తీవ్ర అసంతృప్తి వ్యక్తమవుతోంది. ప్రభుత్వ అధికారుల నిర్లక్ష్యం వల్లే ఇలాంటి ఘటనలు జరుగుతున్నాయంటూ విమర్శలు వెల్లువెత్తుతున్నాయి. మైనర్ బాలికకు జరిగిన అన్యాయం వెంటనే పరిహరించాలనీ, బాధ్యులపై కఠిన చర్యలు తీసుకోవాలని సమాజం డిమాండ్ చేస్తోంది.
