ఉద్యోగం కోసం మూడేళ్లుగా చేసిన ప్రయత్నాలు ఫలించకపోవడంతో బెంగళూరుకు చెందిన యువకుడు ప్రశాంత్ హరిదాస్ లింక్డిన్లో వినూత్నంగా నిరసన వ్యక్తం చేశాడు. “నేను ఇక లేను” అంటూ తన ఫోటోతో పాటు “RIP” అంటూ పోస్టు పెట్టి అందరినీ ఆలోచింపజేశాడు. ఉద్యోగం దొరకక బాధపడుతున్న యువతలో ఎంతోమందికి ఇది ప్రాతినిధ్యంగా మారింది.
తాను ఆత్మహత్య చేసుకునే ఉద్దేశంతో ఈ పోస్టు పెట్టలేదని హరిదాస్ స్పష్టంగా చెప్పాడు. జీవితం అంటే తనకు ఎంతో ప్రేమ అని, ఇంకా ఎన్నో చేయాల్సిన పనులు ఉన్నాయని పేర్కొన్నాడు. తాను తినాల్సిన ఫేవరెట్ ఫుడ్స్, చూడాల్సిన ప్రదేశాలు ఇంకా అనేకమున్నాయని చెప్పాడు. ఈ పోస్ట్ కేవలం ఉద్యోగ విఫలయత్నాలను చాటేందుకు మాత్రమే అని వివరించాడు.
ఈ పోస్ట్ ద్వారా తనకు ఉద్యోగం వస్తుందనే ఆశ కూడా లేదని హరిదాస్ తెలిపాడు. తన బాధను సాటి నిరుద్యోగులకు చేరవేయాలనే ఉద్దేశంతో పెట్టిన ఈ పోస్టు వైరల్ అయింది. చాలామంది నెటిజన్లు హరిదాస్కు తాము తెలిసిన ఉద్యోగ అవకాశాలను సూచించారు. కొన్ని కంపెనీలు రిక్రూట్మెంట్ లింకులు పంపించారు.
ప్రయత్నాలు నిలిపేయొద్దని, ఓ రోజు ఉద్యోగం ఖచ్చితంగా వస్తుందంటూ నెటిజన్లు ధైర్యం చెప్పారు. మానసికంగా ఎన్నో ఒడిదుడుకులు ఎదుర్కొంటున్న నిరుద్యోగుల వేదన ఈ పోస్టు ద్వారా వెలుగులోకి వచ్చింది. ప్రయత్నాలు చేసిన వారెప్పుడూ ఓడిపోరని, ఒక రోజు విజయం ఖచ్చితంగా ఉంటుందని అందరూ ప్రోత్సహించారు.
