నిర్మల్ జిల్లా పోలీస్ ప్రధాన కార్యాలయంలో ఎస్పీ జానకి షర్మిల వార్షిక ప్రెస్ మీట్ నిర్వహించారు. ఈ కార్యక్రమంలో శాంతి భద్రతల పరిరక్షణను ముఖ్య ఉద్దేశంగా తీసుకొని జిల్లా ప్రజలతో మమేకమవుతూ, వినూత్న కార్యక్రమాలను ప్రారంభించినట్లు చెప్పారు. యువత గంజాయి, మద్యం, పేకాట వంటి అసాంఘిక కార్యకలాపాలకు దూరంగా ఉండాలని, చట్ట వ్యతిరేక కార్యకలాపాలకు అడ్డుకట్ట వేయడంలో ప్రజల సహకారం ఎంతో ముఖ్యమని అన్నారు.
“నిర్మల్ పోలీస్ మీ పోలీస్” నినాదంతో బాసర IIIITని దత్తత తీసుకుని విద్యార్థుల భవిష్యత్తు గైడ్లైన్లను మెరుగుపరుస్తున్నామన్నారు. రోడ్డు ప్రమాదాలను తగ్గించేందుకు రోడ్డు భద్రత గ్రామ కమిటీలను ఏర్పాటు చేసి, యువతకు సిపిఆర్ ప్రధాన చికిత్స శిక్షణ అందించారు. గ్రామ స్థాయిలో శాంతి భద్రతలను మెరుగుపరిచే ప్రత్యేక ప్రణాళికలు రూపొందించారు.
జిల్లా వ్యాప్తంగా 5468 సీసీ కెమెరాలను ఏర్పాటు చేసి, జియో టాగింగ్ నిర్వహించామని చెప్పారు. బాసర గోదావరి బ్రిడ్జిపై ఆత్మహత్యలు నివారించేందుకు ఇనుప జాలీలు ఏర్పాటు చేస్తున్నారు. నిర్మల్ పోలీసులు వివిధ పండుగల సమయంలో అదనపు సిబ్బందిపై ఆధారపడకుండా విజయవంతంగా బందోబస్తు నిర్వహించారని పేర్కొన్నారు.
ఇథనాల్ ఫ్యాక్టరీ సమస్యను లాఠీచార్జ్ లేకుండా సామరస్యంగా పరిష్కరించడం జిల్లా పోలీసుల సమర్థతను సూచిస్తుందని షర్మిల తెలిపారు. శాంతియుత చర్చలు, ప్రజలతో కమ్యూనిటీ ఎంగేజ్మెంట్ ద్వారా సమస్యలను పరిష్కరించడం పోలీసింగ్లో కొత్త ప్రమాణాల్ని చూపుతుందని చెప్పారు. 2024లో మరింత ప్రజాప్రియమైన విధానాలతో ప్రజలకు సేవ చేయాలని లక్ష్యంగా పెట్టుకున్నామని తెలిపారు.
