US Iran Ceasefire: అమెరికా-ఇరాన్ మధ్య కుదిరిన కాల్పుల విరమణ నిర్ణయాన్ని భారత్ స్వాగతించింది. పశ్చిమాసియాలో కొనసాగుతున్న ఉద్రిక్త పరిస్థితుల మధ్య ఈ పరిణామం శాంతి దిశగా ముఖ్యమైన అడుగుగా భావిస్తున్నట్టు భారత విదేశాంగశాఖ తెలిపింది.
ఇరుదేశాలు ఘర్షణలను తగ్గించే దిశగా ముందుకు రావడం సానుకూల పరిణామమని పేర్కొంటూ, దీర్ఘకాలిక స్థిరత్వానికి ఇది పునాది కావాలని ఆశాభావం వ్యక్తం చేసింది.
భారత్ స్పష్టం చేసిన ముఖ్యమైన అంశం ఏమిటంటే, ఈ తరహా సంక్షోభాలకు శాశ్వత పరిష్కారం యుద్ధంతో కాదు, దౌత్యపరమైన చర్చల ద్వారానే సాధ్యమవుతుందన్నది.
ఇప్పటికే ఉద్రిక్తతలను తగ్గించడం, నిరంతర సంభాషణ కొనసాగించడం, చర్చల ద్వారా పరిష్కారం కనుగొనడం అవసరమని తాము పలుమార్లు చెప్పిన విషయాన్ని విదేశాంగశాఖ మరోసారి గుర్తు చేసింది.
ఈ యుద్ధం కారణంగా సామాన్య ప్రజలు తీవ్ర ఇబ్బందులు ఎదుర్కొన్నారని, ప్రపంచ ఇంధన సరఫరా వ్యవస్థతో పాటు అంతర్జాతీయ వాణిజ్యంపై కూడా ఒత్తిడి పెరిగిందని పేర్కొంది.
ప్రత్యేకంగా హర్మూజ్ జలసంధి అంశం ఈ ఘర్షణలో కీలకంగా మారిన నేపథ్యంలో, తాజా ఒప్పందం తర్వాత ఆ మార్గంలో నౌకల రాకపోకలు మళ్లీ సాధారణ స్థితికి వస్తాయని భారత్ ఆశిస్తోంది. ఈ మార్గం ప్రపంచ చమురు, వాయువు సరఫరాకు అత్యంత కీలకమైనదిగా భావించబడుతున్నందున, అక్కడ స్థిరత్వం రావడం అంతర్జాతీయ మార్కెట్లకు కూడా ఉపశమనం కలిగించే అంశంగా మారింది.
ఇక,అమెరికా అధ్యక్షుడు డొనాల్డ్ ట్రంప్ రెండు వారాల తాత్కాలిక కాల్పుల విరమణపై ప్రకటన చేయగా, హర్మూజ్ మార్గంలో పరిమిత కాలం సురక్షిత రాకపోకలకు ఇరాన్ అంగీకరించినట్టు పలు అంతర్జాతీయ మీడియా కథనాలు వెల్లడించాయి.
ఈ పరిణామం తాత్కాలిక ఉపశమనం ఇచ్చినా, శాశ్వత శాంతి కోసం ముందున్న చర్చలే అసలు పరీక్షగా నిలవనున్నాయి.
