ఉత్తర ప్రదేశ్‌లోని బరేలీలో పెళ్లి వేడుకలో వింత ఘటన చోటుచేసుకుంది. వరుడు మద్యం మత్తులో వధువు మెడలో కాకుండా, పక్కనే ఉన్న ఆమె స్నేహితురాలికి మాల వేసాడు. ఈ సంఘటనతో ఆగ్రహించిన వధువు వరుడిని చెంపచెళ్లుమనిపించి పెళ్లిని రద్దు చేసుకుంది.
వివరాల్లోకి వెళితే, 21 ఏళ్ల రాధాదేవి, 26 ఏళ్ల రవీంద్ర కుమార్‌ల వివాహం నిర్దేశిత రోజు జరగాల్సి ఉంది. అయితే, వరుడు ఆలస్యంగా, మద్యం మత్తులో పెళ్లి మండపానికి చేరుకున్నాడు. ఆ సమయంలో వధువు కుటుంబానికి అదనపు కట్నం కోసం ఒత్తిడి తెచ్చినట్లు సమాచారం.
వధువు తండ్రి ఇప్పటికే రూ. 4.5 లక్షల కట్నం ఇచ్చినా, వరుడు మరింత డబ్బు కోసం పట్టు పట్టాడు. పెళ్లి వేడుకలో తన స్నేహితులతో కలిసి తాగిన రవీంద్ర, కావాలని అశుభకార్యాలకు పాల్పడ్డాడని వధువు కుటుంబ సభ్యులు ఆరోపించారు.
ఈ వ్యవహారంపై వధువు కుటుంబం పోలీసులకు ఫిర్యాదు చేయగా, వరుడి కుటుంబంపై కేసు నమోదైంది. ఈ ఘటన స్థానికంగా తీవ్ర చర్చకు దారితీసింది. వరకట్నం కోసం పెళ్లిళ్లు వాడుకునే వారి మనస్తత్వాన్ని ఈ ఘటన మరోసారి బయటపెట్టింది.
