స్టేషన్ ఘన్పూర్ ఎమ్మెల్యే కడియం శ్రీహరి తన నియోజకవర్గ అభివృద్ధి పనులపై ముఖ్యమంత్రి రేవంత్ రెడ్డి సహకారం కీలకమని స్పష్టంచేశారు. జనగామ జిల్లా స్టేషన్ ఘన్పూర్ – నవాబ్పేట మధ్య సాగు నీటి కాలువల పూడిక తొలగింపుకు రూ.148 కోట్లు మంజూరు చేయడం, గోదావరి నీళ్లు రిజర్వాయర్ ద్వారా చెరువుల వరకు చేరేలా చర్యలు తీసుకోవడం వంటి పనులు కాంగ్రెస్ ప్రభుత్వ అండతోనే సాధ్యమైందని తెలిపారు. ఏడాదిన్నర కాలంలోనే గోదావరి నీటిని రైతులకు అందించామని, నియోజకవర్గంలోని చెరువులన్నీ నిండిపోయాయని ఆయన ఆనందం వ్యక్తం చేశారు.
మీడియాతో మాట్లాడిన కడియం శ్రీహరి, స్టేషన్ ఘన్పూర్ ప్రజల అభివృద్ధి కోసం ఎప్పటికీ వారి వెంటనే ఉంటానని అన్నారు. “నా నియోజకవర్గ అభివృద్ధి ఆగకూడదన్న ఉద్దేశంతోనే కాంగ్రెస్ ప్రభుత్వంతో కలిసి వెళ్తున్నాను” అని స్పష్టం చేశారు. జె చొక్కారావు దేవాదుల ఎత్తిపోతల పథకం కాలువలు మరమ్మతు చేయాలని, దానివల్ల ప్రజలకు మేలు కలుగుతుందని సీఎం రేవంత్కు వివరించినట్లు చెప్పారు.
మాజీ సీఎం కేసీఆర్పై కూడా కడియం శ్రీహరి తీవ్ర విమర్శలు గుప్పించారు. “ఆనాడు కేసీఆర్ గారు 36 మంది వేరే పార్టీల ఎమ్మెల్యేలను బీఆర్ఎస్లో చేర్చుకుని వారిలో ఇద్దరిని మంత్రులుగా చేశారు. తలసాని శ్రీనివాస్ యాదవ్, సబితా ఇంద్రారెడ్డి ఆ జాబితాలో ఉన్నారు. అప్పుడు వారిలో ఒక్కరూ రాజీనామా చేయలేదు. అప్పుడు రాజకీయ వ్యవస్థను సర్వనాశనం చేసిన వారు ఇప్పుడు నైతిక విలువలు గుర్తు చేసుకోవడం హాస్యాస్పదం” అని ఎద్దేవా చేశారు.
స్పీకర్ నోటీసుల విషయంలో కూడా స్పందించిన కడియం శ్రీహరి, “సుప్రీంకోర్టు ఆదేశాల మేరకు స్పీకర్ నోటీసులు ఇచ్చారు. దానికి నేను కట్టుబడి ఉంటాను. పార్టీ మారిన వాడిగా నేనే మొదటి వాడిని కాదు, చివరివాడిని కూడా కాను. ఇది దేశవ్యాప్తంగా జరుగుతున్న ప్రక్రియ” అని స్పష్టం చేశారు.
బీఆర్ఎస్ నాయకులు ఇప్పుడు విలువల గురించి మాట్లాడటం రాజకీయ కపటమేనని ఆయన నిలదీశారు. “కాంగ్రెస్, వైఎస్ఆర్సీపీ, టీడీపీ, బీఎస్పీ, సీపీఐ నుంచి కూడా ఎమ్మెల్యేలను చేర్చుకున్నది కేసీఆర్గారే. ఆ సమయంలో వారితో రాజీనామాలు ఎందుకు చేయించలేదు? ఆనాడు లేని విలువలు ఇప్పుడు మాత్రమే గుర్తొచ్చాయా?” అని ప్రశ్నించారు.
మొత్తంగా, తన నియోజకవర్గ అభివృద్ధి కోసం మాత్రమే కాంగ్రెస్తో కలిసి పనిచేస్తున్నానని, ప్రజల కోసం ఏం చేసినా అది సూటిగా చెప్పే ధైర్యం తనకు ఉందని కడియం శ్రీహరి స్పష్టం చేశారు.
