సామాజిక సేవలో నిరంతరంగా ముందుండే ‘సూద్ ఛారిటీ ఫౌండేషన్’ ప్రజారోగ్య సంరక్షణలో తమ వంతు సహాయంగా నాలుగు అంబులెన్సులను ఆంధ్రప్రదేశ్ ప్రభుత్వానికి అందించింది. సోనూ సూద్ సోమవారం అమరావతి సచివాలయంలో ముఖ్యమంత్రి నారా చంద్రబాబును కలిశారు. ప్రజలకు అత్యవసర వైద్యం అందించేందుకు తన ఫౌండేషన్ చేస్తున్న ఈ కృషిని సీఎం అభినందించారు.
అంబులెన్స్లను అత్యాధునిక వైద్య సదుపాయాలతో సిద్ధం చేశారు. మారుమూల గ్రామాలకు సైతం అత్యవసర సేవలు చేరేలా ప్రభుత్వ సహకారంతో వీటిని వినియోగిస్తారు. రోగులను వేగంగా ఆసుపత్రికి తరలించేందుకు వీటితో పెద్ద సహాయం అవుతుందని సోనూ సూద్ తెలిపారు. ప్రజారోగ్య సంరక్షణలో తమ వంతు సహాయంగా నిలిచేందుకు ఫౌండేషన్ కృషి చేస్తుందని చెప్పారు.
ఈ సందర్భంగా ముఖ్యమంత్రి చంద్రబాబు మాట్లాడుతూ, ఆరోగ్య రంగానికి మౌలిక సదుపాయాలను పెంపొందించేందుకు తమ ప్రభుత్వం ప్రత్యేక శ్రద్ధ చూపిస్తుందని తెలిపారు. ప్రజల ఆరోగ్య భద్రతలో ఇటువంటి సేవా కార్యక్రమాలు ముఖ్యమైనవని అన్నారు. సోనూ సూద్ సేవలకు ఆయన ప్రత్యేకంగా అభినందనలు తెలియజేశారు.
తమ ఫౌండేషన్ ద్వారా మరిన్ని సేవలు అందించాలని, ఆరోగ్య పరిరక్షణలో మరింత సహకారం అందించేందుకు ముందుకు వస్తామని సోనూ సూద్ తెలిపారు. రాష్ట్ర ప్రజలకు తన ఫౌండేషన్ ద్వారా సహాయం చేయడం తనకు సంతోషంగా ఉందని తెలిపారు.
