Neeraj Yadav: అంతర్జాతీయ క్రీడా వేదికపై భారత జెండాను రెపరెపలాడించిన ఓ ప్రతిభావంతమైన క్రీడాకారుడి జీవితం విషాదంగా ముగిసింది. ఆసియా పారా గేమ్స్‌లో మూడు బంగారు పతకాలు సాధించిన భారత పారా అథ్లెట్ నీరజ్ యాదవ్ (42) ఢిల్లీలోని తన నివాసంలో మృతిచెందారు. బుధవారం జరిగిన ఈ ఘటనపై అధికారులు దర్యాప్తు చేపట్టారు. ఆయన మరణవార్తతో క్రీడా వర్గాల్లో విషాదం నెలకొంది.
డోపింగ్ నిషేధం తర్వాత ఏం జరిగింది?
భారత పారా అథ్లెటిక్స్ జట్టు ప్రధాన కోచ్ ఎస్. సత్యనారాయణ నీరజ్ మరణాన్ని ధ్రువీకరించారు. ఇటీవల జరిగిన ఆసియా పారా గేమ్స్‌లో పాల్గొనే అవకాశాన్ని డోపింగ్ నిషేధం కారణంగా ఆయన కోల్పోయినట్లు సమాచారం. ఈ పరిణామం ఆయనపై ప్రభావం చూపి ఉండవచ్చనే అభిప్రాయాలు వ్యక్తమవుతున్నప్పటికీ, మరణానికి అసలు కారణం ఇంకా నిర్ధారణ కాలేదు. నీరజ్ తీసుకున్న నిర్ణయం పట్ల కోచ్ సత్యనారాయణ విచారం వ్యక్తం చేశారు. అయితే, డోపింగ్ నిషేధమే ఈ ఘటనకు కారణమని నిర్ధారించలేమని పేర్కొన్నారు. పూర్తి వివరాలు దర్యాప్తులో వెల్లడికావాల్సి ఉంది.
వైకల్యాన్ని అధిగమించి అంతర్జాతీయ స్థాయికి..
చిన్న వయసులోనే పోస్ట్‌-పోలియో సమస్యతో శారీరక వైకల్యాన్ని ఎదుర్కొన్న నీరజ్, క్రీడలపై ఆసక్తితో తన ప్రయాణాన్ని కొనసాగించారు. తొలుత వీల్‌చైర్ టెన్నిస్‌లో ప్రయత్నించిన ఆయన, ఆ తర్వాత పారా అథ్లెటిక్స్‌లో తన ప్రతిభను చాటుకున్నారు. 2018లో జకార్తాలో జరిగిన ఆసియా పారా గేమ్స్‌లో జావెలిన్ త్రో విభాగంలో స్వర్ణం సాధించారు. 2023లో హాంగ్‌జౌలో జరిగిన పోటీల్లో జావెలిన్ త్రో, డిస్కస్ త్రో విభాగాల్లో మరో రెండు బంగారు పతకాలు గెలుచుకున్నారు. F55 కేటగిరీలో పోటీపడుతూ దేశానికి అంతర్జాతీయ గుర్తింపు తీసుకొచ్చారు.
క్రీడాకారుల మానసిక ఆరోగ్యంపై చర్చ అవసరం
నీరజ్ మరణం క్రీడాకారులు ఎదుర్కొనే ఒత్తిడి, వైఫల్యాలు, కెరీర్‌లో ఎదురయ్యే సవాళ్ల సమయంలో వారికి అందాల్సిన మానసిక సహకారంపై మరోసారి దృష్టి సారించేలా చేసింది. ఆయన మరణానికి దారితీసిన పరిస్థితులపై స్పష్టత రావాల్సి ఉంది. పతకాలతో దేశానికి గర్వకారణంగా నిలిచిన నీరజ్ సేవలను క్రీడాభిమానులు గుర్తుచేసుకుంటున్నారు.
ALSO READ: Telangana IAS | ఐఏఎస్ అధికారుల శాఖల్లో మార్పులు.. ఎవరికి ఏ బాధ్యతంటే?
