India Russia LNG: అంతర్జాతీయంగా ముడిచమురు ధరలు పెరుగుతున్న వేళ, రష్యా నుంచి ఇంధన సరఫరాలపై భారత్ మళ్లీ దృష్టి సారిస్తోంది. అమెరికా, రష్యా చమురు విక్రయాలపై కొన్ని ఆంక్షలను సడలించడంతో భారత రిఫైనరీలు అక్కడి నుంచి ముడిచమురు దిగుమతులకు ఆర్డర్లు ఇచ్చాయి.
ఇదే సమయంలో, ద్రవరూప సహజ వాయువు (LNG) కొనుగోళ్లను కూడా పునరుద్ధరించే దిశగా కేంద్రం ఆలోచిస్తున్నట్లు సమాచారం. హర్మూజ్ జలసంధి వద్ద నెలకొన్న అవాంతరాలు, పశ్చిమాసియా ఉద్రిక్తతలు, ఖతార్ సరఫరా అంతరాయాలు ఈ నిర్ణయానికి ప్రధాన కారణాలుగా కనిపిస్తున్నాయి.
ఈ నెల 19న భారత పెట్రోలియం, సహజ వాయువు మంత్రి హర్దీప్ సింగ్ పురి, రష్యా డిప్యూటీ ఇంధన మంత్రి పావెల్ సొరోకిన్తో సమావేశమయ్యారు. ఈ భేటీలో ఎల్ఎన్జీ సరఫరాపై కీలక చర్చలు జరిగినట్లు తెలుస్తోంది.
రష్యా నుంచి గ్యాస్ కొనుగోళ్లకు అవసరమైన ఆంక్షల మినహాయింపులపై భారత్ అమెరికాతో కూడా సంప్రదింపులు జరిపినట్లు వార్తలు వెలువడ్డాయి.
అయితే, రష్యా నుంచి ఎల్ఎన్జీ దిగుమతులు ఆర్థికంగా పెద్దగా లాభదాయకం కాకపోవచ్చని విశ్లేషకులు చెబుతున్నారు. ప్రస్తుతం దేశీయ గ్యాస్ కొరతను నివారించడమే కేంద్రానికి అత్యవసరంగా మారింది.
ప్రపంచ ఎల్ఎన్జీ రవాణాలో సుమారు 20 శాతం హర్మూజ్ జలసంధి ద్వారానే సాగుతుంది. ఇదే సమయంలో, భారత్కు కీలక సరఫరాదారైన ఖతార్లోని పెద్ద ఎల్ఎన్జీ ప్లాంట్ యుద్ధ ప్రభావంతో దెబ్బతింది. ఈ పరిస్థితుల వల్ల అంతర్జాతీయంగా గ్యాస్ సరఫరా గణనీయంగా తగ్గిపోయింది.
తాజా అంచనాల ప్రకారం, ప్రపంచ ఎల్ఎన్జీ మార్కెట్ మామూలు స్థితికి రావడానికి ఇంకా కొన్ని సంవత్సరాలు పట్టే అవకాశం ఉంది. ఈ నేపథ్యంలో, ఇంధన భద్రత కోసం భారత్ తీసుకునే తదుపరి నిర్ణయాలు కీలకంగా మారాయి.
