Bandi Sanjay: కేంద్ర హోంశాఖ సహాయ మంత్రి బండి సంజయ్ కుమార్ తెలంగాణ రాజకీయాలపై తీవ్ర వ్యాఖ్యలు చేశారు. కరీంనగర్లో ఉగాది వేడుకల్లో పాల్గొన్న ఆయన, ముఖ్యమంత్రి రేవంత్ రెడ్డి ఉపయోగిస్తున్న భాషపై తీవ్రంగా స్పందించారు.
‘తొక్కుకుంటూ వచ్చాను’ అన్న వ్యాఖ్యలను తప్పుబడుతూ, అది అహంకారానికి నిదర్శనమని విమర్శించారు. ప్రజల మద్దతుతో గెలిచానని చెప్పాల్సిన చోట ఇలా మాట్లాడటం సరికాదని అన్నారు.
శాసనసభలో ‘వందేమాతరం’ గేయాన్ని ఎంఐఎం ఎమ్మెల్యేలు బహిష్కరించడం దేశభక్తికి విరుద్ధమని బండి సంజయ్ మండిపడ్డారు. జాతీయ గేయాన్ని అవమానించిన వారిపై ప్రభుత్వం చర్యలు తీసుకోవాలని డిమాండ్ చేశారు. బీజేపీ అధికారంలో ఉంటే కఠిన చర్యలు తీసుకునేవాళ్లమని హెచ్చరించారు.
రైతు భరోసా అమలులో కాంగ్రెస్ ప్రభుత్వం విఫలమైందని ఆరోపిస్తూ, రైతులకు వేల కోట్ల బకాయిలు ఉన్నాయని తెలిపారు. ఒక్కో రైతుకు, కూలీలకు రావాల్సిన డబ్బులు వెంటనే చెల్లించాలని డిమాండ్ చేశారు.
మూసీ నది ప్రక్షాళనకు తాము వ్యతిరేకం కాదని, కానీ పేదల ఇళ్లను కూల్చడాన్ని అంగీకరించమని స్పష్టం చేశారు. బాధితులకు ముందుగా ఇళ్లు కట్టించి తరువాతే పనులు చేపట్టాలని సూచించారు.
అలాగే కాంగ్రెస్, బీఆర్ఎస్ మధ్య రహస్య ఒప్పందం ఉందని ఆరోపిస్తూ, అవినీతి అంశాల్లో చర్యలు తీసుకోవడం లేదని విమర్శించారు. దేశ భద్రతలో హోంశాఖ కీలకమని, తన బాధ్యతపై గర్వంగా ఉన్నానని బండి సంజయ్ పేర్కొన్నారు.
