చైనాలో పనిచేస్తున్న తన అధికారులకు, సిబ్బందికి అమెరికా ప్రభుత్వం కీలక హెచ్చరిక జారీ చేసింది. చైనీయులతో ప్రేమ, వివాహం, శారీరక సంబంధాలు ఏర్పరచుకోవద్దని స్పష్టం చేసింది. ఈ ఆదేశాలు చైనాలో ఉన్న అమెరికా మిషన్కు చెందిన అధికారులు, కాంట్రాక్టర్లు, భద్రతా అనుమతులు ఉన్న కుటుంబ సభ్యులపై కూడా వర్తిస్తాయని తెలిపింది.
ఈ నిబంధనలు ఉల్లంఘించినవారిని వెంటనే విధుల నుంచి తొలగిస్తామని అమెరికా తేల్చి చెప్పింది. వ్యక్తిగత జీవితాలపై ఇటువంటి ఆంక్షలు మితిమీరినవే అయినా, జాతీయ భద్రతకే ప్రాధాన్యత ఇవ్వాల్సిన అవసరం ఉందని అధికార వర్గాలు పేర్కొంటున్నాయి. చైనా ప్రభుత్వంతో సంబంధాలపై అమెరికా ప్రభుత్వం ఇప్పటికే శ్రద్ధ తీసుకుంటోంది.
ఇటీవలే చైనాలో అమెరికా రాయబారి నికోలస్ బర్న్స్ తన పదవికి గుడ్బై చెప్పిన వెంటనే ఈ ఆదేశాలు రావడం గమనార్హం. ఈ చర్యలతో అమెరికా ప్రభుత్వమే తన సిబ్బంది భద్రత పట్ల ఎంత జాగ్రత్తగా ఉందో స్పష్టం అవుతోంది. చైనాతో సంపర్కాల్లో చిక్కుకునే అవకాశం ఉన్న పరిస్థితులను నియంత్రించడమే లక్ష్యంగా ఈ ఆంక్షలు విధించినట్లు భావిస్తున్నారు.
ఈ నిర్ణయం కేవలం అధికారులపై మాత్రమే కాకుండా వారి కుటుంబ సభ్యులపై కూడా ప్రభావం చూపుతోంది. వ్యక్తిగత సంబంధాలపై ప్రభావం పడుతుండటం విమర్శలకు దారి తీస్తోంది. అయినా సరే, భద్రతాపరమైన దృష్టికోణంలో చూస్తే, ఇది అవసరమైన ముందస్తు జాగ్రత్తగా అమెరికా పేర్కొనడంలో సందేహం లేదు.
