బాలీవుడ్ మరియు బాడీబిల్డింగ్ ప్రపంచం విషాదంలో మునిగిపోయింది. ప్రముఖ బాడీబిల్డర్, నటుడు వరీందర్ సింగ్ ఘుమన్ (42) గుండెపోటుతో హఠాన్మరణం చెందాడు. కేవలం 42 ఏళ్ల వయసులోనే ఆయన అకాల మరణం సినీ మరియు క్రీడా వర్గాలను దిగ్భ్రాంతికి గురి చేసింది.
అమృత్సర్లోని ఫోర్టిస్ ఆసుపత్రిలో చికిత్స పొందుతూ అక్టోబర్ 10 సాయంత్రం 5:30 గంటల సమయంలో వరీందర్ తుదిశ్వాస విడిచినట్లు వైద్యులు ధ్రువీకరించారు. ఆయన మరణవార్తను పంజాబ్ మాజీ ఉప ముఖ్యమంత్రి, ఎంపీ సుఖీందర్ సింగ్ రంధావా తన ఎక్స్ (ట్విట్టర్) ఖాతా ద్వారా వెల్లడించారు.
వరీందర్ మృతి పట్ల రంధావా తీవ్ర విచారం వ్యక్తం చేస్తూ, “ప్రఖ్యాత బాడీబిల్డర్, నటుడు వరీందర్ సింగ్ ఘుమన్ అకాల మరణం బాధాకరం. ఆయన క్రమశిక్షణ, కృషితో ప్రపంచవ్యాప్తంగా పంజాబ్ పేరు నిలబెట్టారు. కుటుంబానికి భగవంతుడు ధైర్యం ఇవ్వాలని ప్రార్థిస్తున్నాను” అని పేర్కొన్నారు. భారత హాకీ మాజీ కెప్టెన్ పర్జత్ సింగ్ కూడా స్పందిస్తూ, “శాకాహారిగా క్రమశిక్షణతో బాడీబిల్డింగ్లో గొప్ప పేరు సంపాదించిన వరీందర్ మృతి బాధాకరం” అని అన్నారు.
2009లో ‘మిస్టర్ ఇండియా’ టైటిల్ను గెలుచుకున్న వరీందర్, తరువాత ‘మిస్టర్ ఆసియా’ పోటీల్లో రెండో స్థానంలో నిలిచాడు. 2012లో ‘కబడ్డీ వన్స్ మోర్’ పంజాబీ చిత్రంతో నటుడిగా రంగప్రవేశం చేసి, ఆ తర్వాత ‘రోర్: టైగర్స్ ఆఫ్ ది సుందర్బన్స్’ (2014), ‘మర్జావాన్’ (2019) వంటి బాలీవుడ్ చిత్రాల్లో నటించాడు. ఇటీవల సల్మాన్ ఖాన్ హీరోగా వచ్చిన ‘టైగర్ 3’లో కీలక పాత్ర పోషించాడు.
వరీందర్ సింగ్ ఘుమన్ మరణం సినీ అభిమానులు, బాడీబిల్డింగ్ ప్రపంచం మరియు పంజాబ్ ప్రజలకు అపారమైన నష్టం అని అభిమానులు సోషల్ మీడియాలో వ్యక్తం చేస్తున్నారు.
