యూట్యూబర్ అన్వేష్ చుట్టూ ఉచ్చు బిగుస్తోంది. వివాదాస్పద వీడియోలు, అసభ్యకర పదజాలంతో సామాజిక నిబంధనలను ఉల్లంఘిస్తున్నాడనే ఆరోపణలతో పంజాగుట్ట పోలీసులు అతడి డిజిటల్ సామ్రాజ్యాన్ని కుప్పకూల్చేందుకు సిద్ధమయ్యారు. అన్వేష్కు చెందిన రెండు ఇన్స్టాగ్రామ్ ఖాతాలు, రెండు యూట్యూబ్ ఛానళ్లను శాశ్వతంగా నిలిపివేయాలని పోలీసులు నిర్ణయించారు. ఈ మేరకు అన్వేష్ తన వీడియోల ద్వారా అసభ్యకరమైన ప్రవర్తనను ప్రోత్సహిస్తున్నట్లు గుర్తించిన అధికారులు, ఆయా సోషల్ మీడియా ప్లాట్ఫామ్ల ప్రతినిధులకు లేఖలు రాయనున్నారు. రాష్ట్ర సైబర్ క్రైమ్ విభాగంతో పాటు పంజాగుట్ట ఏసీపీ కార్యాలయం నుండి ఈ అభ్యర్థనలు వెళ్లనున్నాయి.
ఇప్పటికే అన్వేష్పై లుకౌట్ నోటీసులు జారీ అయినప్పటికీ, అతడి ప్రవర్తనలో మార్పు రాకపోవడం పోలీసుల ఆగ్రహానికి కారణమైంది. “నన్ను ఎవరూ ఏమీ చేయలేరు” అంటూ ఇటీవల ఆయన విడుదల చేసిన వీడియోలు, చట్టాన్ని సవాల్ చేసేలా ఉన్నాయని అధికారులు భావిస్తున్నారు. తన ఒక అకౌంట్ బ్లాక్ అయినప్పటికీ, తనకు మరిన్ని ప్రత్యామ్నాయ మార్గాలు ఉన్నాయంటూ ఆయన చేసిన వ్యాఖ్యలను పోలీసులు సీరియస్గా తీసుకున్నారు. సమాజంపై తప్పుడు ప్రభావం చూపిస్తున్న అన్వేష్కు ఇకపై ఎటువంటి డిజిటల్ వేదికలు లేకుండా చేసేందుకు పోలీసులు పక్కా వ్యూహంతో ముందుకు వెళ్తున్నారు.
