జోగులాంబ గద్వాల జిల్లా ధరూర్ మండల కేంద్రంలో మెడికల్ కాలేజీ విద్యార్థులు శనివారం ప్రత్యేక సామాజిక సేవా కార్యక్రమాన్ని ప్రారంభించారు. “కుటుంబ దత్తత” పేరుతో ఈ కార్యక్రమాన్ని చేపట్టిన విద్యార్థులు, గ్రామీణ ప్రజల ఆరోగ్య పరిస్థితులను మెరుగుపర్చే లక్ష్యంతో ముందుకు సాగుతున్నారు. దాదాపు 50 నుంచి 100 మంది విద్యార్థులు ఈ కార్యక్రమంలో భాగస్వాములయ్యారు.
ప్రతి విద్యార్థి ఐదు కుటుంబాలను దత్తత తీసుకొని, వారి ఆరోగ్య సమస్యలను గుర్తించి, అవసరమైన మార్గదర్శకాలు అందించనున్నారు. ముఖ్యంగా గ్రామీణ ప్రజలకు సరైన వైద్య సహాయం అందించేందుకు, వారిలో ఆరోగ్య చైతన్యాన్ని పెంచేందుకు ఈ ప్రాజెక్ట్ ఉపయోగకరంగా మారనుంది. విద్యార్థులు నిరంతరంగా కుటుంబాలతో సమీప సంబంధాన్ని ఉంచి, వారికి మెరుగైన వైద్య సేవలు అందించేందుకు కృషి చేయనున్నారు.
ఈ సందర్భంగా మెడికల్ కాలేజీ అధ్యాపక బృందం, ఎంబిబిఎస్ మొదటి సంవత్సరం విద్యార్థులు తమ అభిప్రాయాలను ఏ వన్ టీవీ ద్వారా పంచుకున్నారు. గ్రామీణ ప్రజల ఆరోగ్యాన్ని పర్యవేక్షించడం ద్వారా మెడికల్ విద్యార్థులు తమ సామాజిక బాధ్యతను నిర్వర్తిస్తున్నారని, ఇదే విధంగా మరిన్ని సేవా కార్యక్రమాలు చేపట్టాలని ప్రొఫెసర్లు సూచించారు.
ఈ కార్యక్రమం ద్వారా గ్రామీణ ప్రజల ఆరోగ్య పరిస్థితులను మెరుగుపరచడంతో పాటు, మెడికల్ విద్యార్థులకు ప్రాక్టికల్ అవగాహన కలుగుతుందని భావిస్తున్నారు. ఈ ప్రాజెక్ట్ విజయవంతమైతే ఇతర జిల్లాల్లోనూ అమలు చేసే అవకాశం ఉందని అధికారులు తెలిపారు.
