హైదరాబాద్ నగరంలో సాధారణ ఆర్టీసీ బస్సు పాస్ హోల్డర్లకు శుభవార్త. తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) ఒక కొత్త పథకాన్ని ప్రారంభించింది. ఇందులో భాగంగా, ఈ పాస్ హోల్డర్లు అదనంగా ₹20 చెల్లించి మెట్రో డీలక్స్ బస్సుల్లో ప్రయాణించే అవకాశం పొందుతారు. నగరంలో ఇంతవరకు వీరికి ఈ సౌకర్యం అందుబాటులో లేకపోవడంతో, ఈ నిర్ణయం ప్రయాణికుల కోసం మంచి ఆప్షన్గా మారనుంది.
‘మెట్రో కాంబో టికెట్’ పేరుతో ఈ కొత్త పథకాన్ని టీజీఎస్ఆర్టీసీ ప్రవేశపెట్టింది. ఈ టికెట్ ను సాధారణ బస్ పాస్ ఉన్న ప్రయాణికులు లేదా మెట్రో బస్ పాస్ కలిగిన ప్రయాణికులు కూడా ఉపయోగించుకోవచ్చు. ప్రయాణికులు ఈ కాంబో టికెట్ ను పొందాలంటే, వారు రూ. 20 అదనంగా చెల్లించాల్సి ఉంటుంది.
ఈ టికెట్ సాయంతో, ప్రయాణికులు ఆ రోజున నగరంలోని అన్ని మెట్రో డీలక్స్ బస్సు సర్వీసులలో తిరుగొచ్చే అవకాశం ఉంటుంది. ఈ నిర్ణయం హైదరాబాద్లో ప్రయాణ అనుభవాన్ని మెరుగుపరచడం కోసం తీసుకున్నట్లు టీజీఎస్ఆర్టీసీ అధికారులు పేర్కొన్నారు. ప్రయాణికుల కోసం మరింత సౌకర్యవంతమైన ప్రయాణ మార్గాలను అందించడమే లక్ష్యంగా ఈ పథకాన్ని ఆవిష్కరించారు.
టీజీఎస్ఆర్టీసీ మేనేజింగ్ డైరెక్టర్ వీసీ సజ్జనార్ ఈ కొత్త పథకం గురించి ‘ఎక్స్’ వేదికగా వివరించారు. హైదరాబాద్ నగరంలోని అన్ని మెట్రో డీలక్స్ బస్సు సర్వీసులకు ఈ కొత్త పథకం వర్తిస్తుందని ఆయన చెప్పారు. దీంతో, మటుకు మెట్రో డీలక్స్ బస్సులను ఉపయోగించుకునే ప్రయాణికుల సంఖ్య పెరిగే అవకాశం ఉంది.
