Windows 11: మైక్రోసాఫ్ట్ విడుదల చేసిన తాజా విండోస్ 11 అప్డేట్ వినియోగదారులకు కొత్త సమస్యలను తెచ్చిపెట్టింది. ముఖ్యంగా 24H2, 25H2 వెర్షన్లలో మార్చి 10, 2026న విడుదలైన KB5079473 అప్డేట్ తర్వాత కొంతమంది యూజర్లు మైక్రోసాఫ్ట్ ఖాతాలతో సైన్-ఇన్ కావడంలో ఇబ్బందులు ఎదుర్కొంటున్నారు.
ఇంటర్నెట్ సరిగా పనిచేస్తున్నప్పటికీ, వన్డ్రైవ్, మైక్రోసాఫ్ట్ టీమ్స్ ఫ్రీ, ఆఫీస్ వంటి యాప్లలో ‘నో ఇంటర్నెట్ కనెక్షన్’ అనే ఎర్రర్ కనిపిస్తూ లాగిన్ను అడ్డుకుంటోందని మైక్రోసాఫ్ట్ అధికారికంగా అంగీకరించింది.
ఈ సమస్య ప్రధానంగా మైక్రోసాఫ్ట్ అకౌంట్ ఉపయోగించే సాధారణ వినియోగదారులను ప్రభావితం చేస్తుండగా, ఎంటర్ప్రైజ్ వినియోగదారులు ఉపయోగించే మైక్రోసాఫ్ట్ ఎంట్రా ఐడీపై దీని ప్రభావం లేదని కంపెనీ స్పష్టం చేసింది.
ఈ బగ్ కారణంగా యూజర్లకు నిజంగా ఇంటర్నెట్ ఉన్నప్పటికీ పరికరం ఆఫ్లైన్లో ఉన్నట్టుగా వ్యవస్థ చూపిస్తోంది. ఫలితంగా OneDrive సింక్, Teams Free యాక్సెస్, Office లాగిన్, Microsoft 365 Copilot వంటి సేవల్లో ఆటంకాలు ఏర్పడుతున్నాయి.
మైక్రోసాఫ్ట్ ప్రకారం ఇది ఒక నిర్దిష్ట నెట్వర్క్ పరిస్థితిలో కనిపించే సమస్య. కొన్ని సందర్భాల్లో పరికరాన్ని ఇంటర్నెట్ కనెక్ట్గానే ఉంచి రీస్టార్ట్ చేస్తే తాత్కాలికంగా సమస్య సరిదిద్దబడవచ్చు. అయితే ఇది శాశ్వత పరిష్కారం కాదని, ప్రత్యేక ఫిక్స్పై పని చేస్తున్నామని కంపెనీ తెలిపింది.
ఈ ఫిక్స్ ‘అవుట్-ఆఫ్-బ్యాండ్’ అప్డేట్ రూపంలో వచ్చే అవకాశం ఉందని అధికారిక రీలీజ్ హెల్త్ పేజీలు సూచిస్తున్నాయి.
ఇటీవలే విండోస్ 11 అప్డేట్లతో సంబంధించి ఇతర సమస్యలు కూడా వెలుగులోకి రావడం గమనార్హం. కొంతమంది వినియోగదారులకు C: డ్రైవ్ యాక్సెస్ సమస్యలు, యాప్ ఫెయిల్యూర్లు వంటి ఇబ్బందులు నమోదయ్యాయని మైక్రోసాఫ్ట్ పేర్కొంది.
దీంతో ఈ ఏడాది విండోస్ అప్డేట్లు యూజర్లకు మరింత జాగ్రత్త అవసరమనే సంకేతాలు ఇస్తున్నాయి. ప్రస్తుతం ప్రభావిత యూజర్లు అధికారిక ఫిక్స్ విడుదలయ్యే వరకు రీస్టార్ట్ వంటి తాత్కాలిక మార్గాలనే అనుసరించాల్సి వస్తోంది.
