గ్లోబల్ స్టార్ ప్రియాంక చోప్రా ప్రతి పండుగను తనదైన శైలిలో ఘనంగా జరుపుకుంటారు. ఈసారి కూడా దీపావళి సందర్భంగా ఆమె అమెరికాలోని న్యూయార్క్లో తన స్నేహితుల కోసం ఒక అద్భుతమైన లంచ్ పార్టీ ఏర్పాటు చేశారు. ఈ వేడుకకు హాజరైన వారందరినీ ఆకట్టుకున్నది ప్రియాంక ఏర్పాటు చేసిన ప్రత్యేకమైన దేశీ విందు. విదేశాల్లో ఉన్నప్పటికీ, భారతీయ సాంప్రదాయ వంటకాలతో నిండిన ఈ ఫుడ్ ఫెస్ట్ ప్రస్తుతం సోషల్ మీడియాలో చర్చనీయాంశంగా మారింది.
ఈ పార్టీకి కేటరింగ్ బాధ్యతలు చేపట్టిన ప్రముఖ చెఫ్ ప్రియావంద చౌహాన్, ప్రియాంక మెనూలోని వంటకాల వివరాలను పంచుకున్నారు. చిన్నపిల్లల నుంచి పెద్దల వరకు అందరినీ దృష్టిలో ఉంచుకుని వివిధ రకాల వంటకాలను సిద్ధం చేశారు. స్టార్టర్స్లో పాపడి చాట్, భేల్ పూరి, మసాలా ఫ్రైస్, చిల్లీ పన్నీర్ బైట్స్, మినీ కత్తీ రోల్స్, చీజ్తో కూడిన బొంబాయి శాండ్విచ్ వంటివి వడ్డించారు.
పిల్లల కోసం ప్రత్యేకంగా ఏర్పాటు చేసిన ‘మినీ దోశ లైవ్ స్టేషన్’ పార్టీలో ప్రధాన ఆకర్షణగా నిలిచింది. అక్కడ పిల్లలు తమకు నచ్చినట్టుగా ప్లెయిన్ దోశ, చీజ్ దోశ, ఆలూ దోశ వంటివి ఆర్డర్ చేసుకునే అవకాశం కల్పించారు. వాటిపై కొబ్బరి చట్నీ, పన్నీర్ భుర్జీ, స్వీట్ కార్న్ వంటి టాపింగ్స్ కూడా అందుబాటులో ఉంచారు. పిల్లలకు బటర్ చికెన్ స్లైడర్స్, వెజ్ పిజ్జా స్క్వేర్స్, మ్యాక్ & చీజ్ కప్స్ వంటివి కూడా ఎంతో నచ్చాయి.
పెద్దల కోసం మెయిన్ కోర్స్లో బటర్ చికెన్ కర్రీ, పన్నీర్ టిక్కా మసాలా, హక్కా నూడుల్స్ కప్స్ వంటి వంటకాలు వడ్డించారు. డ్రింక్స్గా మ్యాంగో లస్సీ, స్ట్రాబెర్రీ షేక్స్ అందరినీ అలరించాయి.
డెజర్ట్స్ విభాగంలో సంప్రదాయానికి ఆధునికతను కలిపిన ఫ్యూజన్ స్వీట్స్ ప్రత్యేక ఆకర్షణగా నిలిచాయి. గులాబ్ జామూన్ చీజ్కేక్ బైట్స్, రబ్రీ డ్రిజిల్తో బ్రౌనీ బైట్స్, కేక్ పాప్స్ వంటి ప్రత్యేక వంటకాలు ప్రతి ఒక్కరినీ ఆశ్చర్యపరిచాయి.
మొత్తానికి, ఫుడ్ లవర్ అయిన ప్రియాంక చోప్రా తన దీపావళి విందులో వంటకాల విషయంలో ఎటువంటి రాజీ పడలేదని ఈ వేడుక స్పష్టంగా చూపించింది. విదేశాల్లో ఉన్నప్పటికీ, దేశీ పండుగ ఆత్మను నిలబెట్టిన ప్రియాంక తన వేడుకతో అభిమానులను మరలా ఆకట్టుకున్నారు.
