ఆంధ్రప్రదేశ్ రాష్ట్రంలో ఉన్నత విద్యా రంగానికి ఒక కొత్త దిశా నిర్దేశం లభించింది. రాజధాని అమరావతిలో అంతర్జాతీయ స్థాయి న్యాయ విశ్వవిద్యాలయం ఏర్పాటుకు రాష్ట్ర శాసనమండలి గ్రీన్ సిగ్నల్ ఇచ్చింది. ఈ నిర్ణయం ద్వారా న్యాయ విద్య, పరిశోధన రంగాల్లో రాష్ట్రం కొత్త స్థాయికి చేరుకోనుందని నిపుణులు విశ్లేషిస్తున్నారు.
రాష్ట్ర విద్యా, ఐటీ శాఖల మంత్రి నారా లోకేశ్ శాసనమండలిలో మూడు కీలక విద్యా బిల్లులను ప్రవేశపెట్టగా, సభ వాటికి ఆమోదం తెలిపింది. ఈ బిల్లుల్లో ముఖ్యమైనది ‘ఇండియా ఇంటర్నేషనల్ యూనివర్సిటీ ఆఫ్ లీగల్ ఎడ్యుకేషన్ అండ్ రీసెర్చ్ ఆఫ్ ద బార్ కౌన్సిల్ ఆఫ్ ఇండియా ట్రస్ట్’ ఏర్పాటుకు సంబంధించినది. ఈ వర్సిటీని అమరావతిలో ఏర్పాటు చేసేందుకు కూటమి ప్రభుత్వం 55 ఎకరాల స్థలాన్ని కేటాయించింది. ముఖ్యంగా ఏపీ విద్యార్థులకు 25 శాతం సీట్లు రిజర్వ్ చేస్తూ ప్రభుత్వం తీసుకున్న నిర్ణయం విద్యార్థులు, తల్లిదండ్రుల్లో ఆనందాన్ని నింపింది.
ఈ వర్సిటీతో పాటు ఆర్బిట్రేషన్, మీడియేషన్ సెంటర్లు కూడా ఏర్పాటు కానున్నాయి. అంతర్జాతీయ స్థాయి వనరులు, బోధనా విధానాలతో ఈ వర్సిటీ దేశవ్యాప్తంగా ఒక ప్రత్యేక గుర్తింపు తెచ్చుకునే అవకాశం ఉంది. మంత్రి లోకేశ్ మాట్లాడుతూ, “గవర్నర్ ప్రత్యేక చొరవతో ఈ ప్రతిష్ఠాత్మక సంస్థను రాష్ట్రానికి సాధించగలిగాం” అని అన్నారు.
ఇక మరో కీలక అంశంగా, కర్నూలులో హైకోర్టు బెంచ్ ఏర్పాటు ప్రక్రియ కూడా ప్రారంభమైనట్లు మంత్రి లోకేశ్ వెల్లడించారు. ఎన్నికల సమయంలో ఇచ్చిన హామీని నిలబెట్టుకోవడానికి ప్రభుత్వం కట్టుబడి ఉందని ఆయన స్పష్టం చేశారు.
ప్రైవేటు విశ్వవిద్యాలయాల చట్టంలో సవరణల గురించి కూడా లోకేశ్ ప్రస్తావించారు. గత ప్రభుత్వం చేసిన మార్పుల వల్ల కొత్త విశ్వవిద్యాలయాల ఏర్పాటుకు అడ్డంకులు ఏర్పడ్డాయని అన్నారు. ముఖ్యంగా టాప్-100 గ్లోబల్ యూనివర్సిటీలతో జాయింట్ సర్టిఫికేషన్ డిగ్రీ తప్పనిసరిగా ఉండాలనే నిబంధన యూజీసీ మార్గదర్శకాలకు వ్యతిరేకమని, దీనివల్ల రాష్ట్రంలో ప్రైవేటు, విదేశీ వర్సిటీల రాక కష్టతరమైందని ఆయన వ్యాఖ్యానించారు.
ఈ సవరణలతో ఇకపై ప్రభుత్వ, ప్రైవేటు రంగాల్లో వర్సిటీల ఏర్పాటు సులభతరం అవుతుందని లోకేశ్ తెలిపారు. అంతర్జాతీయ స్థాయి విద్య, పరిశోధనలను రాష్ట్రానికి అందించే లక్ష్యంతో ప్రభుత్వం తీసుకున్న ఈ నిర్ణయాలు ఏపీ ఉన్నత విద్యా రంగంలో పెద్ద మలుపుగా నిలిచే అవకాశముంది.
