టాలీవుడ్ సీనియర్ నటుడు మోహన్ బాబు తన లైసెన్స్ గన్ను పోలీసులకు అప్పగించారు. ఈ రోజు హైదరాబాద్ నుండి ఏపీలోని చిత్తూరు జిల్లా చంద్రగిరి మండలంలోని రంగంపేటలో ఉన్న తన యూనివర్సిటీకి వెళ్లిన మోహన్ బాబు, అనంతరం చంద్రగిరి పోలీస్ స్టేషన్లో తన డబుల్ బ్యారెల్ లైసెన్స్డ్ గన్ను పీఆర్ఓ ద్వారా డిపాజిట్ చేయించారు. ఇటీవల కుటుంబ గొడవల కారణంగా హైదరాబాద్ పోలీసులు ఆయన్ని గన్ సరెండర్ చేయాలని ఆదేశించారు.
ఈ నేపథ్యంలో ఆయన తన లైసెన్స్ గన్ను అప్పగించడంతో పోలీసులు ఈ విషయాన్ని ధృవీకరించారు. మోహన్ బాబు కుటుంబ గొడవల నేపథ్యంతో ఈ నిర్ణయం తీసుకున్నారని, పోలీసుల సూచన మేరకు ఆయన ఈ చర్య చేపట్టారని సమాచారం.
మరోవైపు, జలపల్లి వద్ద తన నివాసంలో జరిగిన ఘటనా సందర్భంలో మోహన్ బాబు తాజాగా మాట్లాడారు. ఈ ఘటనపై ఆయన స్పష్టం చేశారు, “తాను ఉద్దేశపూర్వకంగా జర్నలిస్టుపై దాడి చేయలేదని” తెలిపారు. ఈ సందర్భంలో, జర్నలిస్టుల నుంచి తన ప్రవర్తనపై అభ్యంతరాలు వచ్చిన నేపథ్యంలో ఆయన క్షమాపణలు కూడా కోరారు.
ఆదివారం జరిగిన దాడిలో గాయపడిన జర్నలిస్టును మోహన్ బాబు, ఆయన కుమారుడు మంచు విష్ణు ఆసుపత్రికి వెళ్లి పరామర్శించారు.
