అనంతపురం జిల్లా రామగిరిలో సీఎం జగన్‌మోహన్ రెడ్డి టూర్ సమయంలో భద్రతా విఫలమైందని వైసీపీ నేతలు ఆరోపిస్తున్నారు. ప్రజలు భారీగా తరలిరావడంతో హెలికాప్టర్ దగ్గర గందరగోళం నెలకొంది. ఆ తాకిడికి హెలికాప్టర్ విండ్షీల్డ్ డ్యామేజ్ అయింది. దీంతో జగన్ హెలికాప్టర్ ప్రయాణాన్ని రద్దు చేసుకుని కారులో బెంగళూరుకు వెళ్లిపోయారు. ఈ ఘటనపై రాష్ట్రవ్యాప్తంగా రాజకీయ చర్చలు వేడెక్కిస్తున్నాయి.
వైసీపీ నేతలు రాష్ట్ర ప్రభుత్వంపై నిప్పులు చెరుగుతున్నారు. జగన్‌కు సరైన భద్రత కల్పించడంలో రాష్ట్ర ప్రభుత్వ యంత్రాంగం పూర్తిగా విఫలమైందని ఆరోపిస్తున్నారు. బొత్స సత్యనారాయణ ఆరోపిస్తూ, హెలిపాడ్‌ దగ్గర కనీసం వంద మంది పోలీసులు కూడా లేరని అన్నారు. 1100 మంది సెక్యూరిటీ ఉందన్న ప్రభుత్వ వాదనను నమ్మలేమని స్పష్టం చేశారు.
దీనికి కౌంటర్‌గా మంత్రి నిమ్మల రామానాయుడు వైసీపీ నేతలపై తీవ్రస్థాయిలో విమర్శలు చేశారు. ప్రజలను డబ్బులు ఇచ్చి హెలికాఫ్టర్ దగ్గరికి తేవడమే ఈ సమస్యకు కారణమని అన్నారు. భద్రతను తాము ప్రాధాన్యతగా తీసుకుంటున్నామని, కానీ వైసీపీ తీరే గందరగోళానికి దారితీసిందని విమర్శించారు. పోలీసులు 250 మందిని ఏర్పాటు చేసినప్పటికీ, వైసీపీ నేతలు కావాలనే ఈ అంశాన్ని రాజకీయంగా వాడుకుంటున్నారని పేర్కొన్నారు.
ఇక ఈ వివాదం రాజకీయంగా ముదురుతోంది. గల్లీ నుంచి ఢిల్లీ దాకా ఈ పరిణామాలు రాజకీయంగా ప్రభావం చూపేలా కనిపిస్తున్నాయి. సీపీఐ నేత రామకృష్ణ మాట్లాడుతూ, జగన్ భద్రతపై ఆందోళన వ్యక్తం చేశారు. ఈ విషయంలో అధికార కూటమి సీరియస్‌గా స్పందించాలని సూచించారు. భద్రతా లోపాలు నిజమైతే వెంటనే చర్యలు తీసుకోవాలని ప్రజలు కోరుతున్నారు.
